A krea tereno pa futbòl i hóbennan di Kura Piedra mes ta limpia

A krea tereno pa futbòl i hóbennan di Kura Piedra mes ta limpia

Geplaatst op 16 December 2019 dor di Ministerio Desaroyo Sosial, Labor i Bienestar

den kombinashon ku 1 Focus Diferente, Dusron, Aliansa i SOAW

Willemstad – Tin bastante proyekto den bario ku a keda efektuá ku asistensia di 1 Focus Diferente. E biaha aki a toka hóbennan di Kura Piedra. A toka nan, pa nan mes hasi algu pa nan bario. E hóbennan mes a limpia i tambe nan a yuda konstruí nan mes vèlt di futbòl.
Ministerio di Desaroyo Sosial, Labor i Bienestar tin komo tarea pa fungi komo fasilitadó den e proseso di desaroyo di barionan. Mirando e trabounan ku Fundashon 1 Focus Diferente a bin ta desplegá den diferente bario na Kòrsou, e ministerio a join forces ku e fundashon aki pa inspirá e biaha aki habitantenan di Kurá Piedra.

Fundashon 1 Focus Diferente ta un organisashon, liderá pa sr. Eldrion Regina, ku tei pa inspirá nos komunidat pa e por mira kosnan den un lus positivo. E Fundashon ta hasi esaki mediante videonan ku ta ampliamente konosí riba medionan sosial i tambe nan sa pasa na plantanan di televishon.
E fundashon ta usa un método basá riba kompetivísmo, e espíritu di kompetensia ku ta biba bou di nos hubentut. Hóbennan, hasiendo algu ku ta benefisiá nan mes bario, ta haña un chèns pa kompetí i gana un premio.
Ku e bario di Kura Piedra a bai un tiki diferente. A aserká habitantenan i lidernan di bario. Den diálogo a señalá 3 problema agudo. Hóbennan tabata sinti falta di un vèlt di futbòl adekuá, tabatin hopi sushi den bario i tambe a konstatá ku tin hopi sushi rondó di Maduro School.

Fundashon 1 Focus Diferente i Ministerio di Desaroyo Sosial (SOAW) a kombení ku SOAW lo kontribuí ku un granito banda di tur otro instansia i persona ku a yuda pa realisá e proyekto aki.
Hóbennan di Kura Piedra a limpia rondó di Maduro School, Dusron i Aliansa a krea nan vèlt asfaltá nobo di futbòl rondoná ku heki banda di e School i tambe e tim a limpia den besindario di SITEK. Pa koroná e obra, Fundashon 1 Focus Diferente a krea un video inspirativo nobo ku lo subi medionan sosial i tambe lo keda transmití na kanal di televishon pa tur habitante di Kòrsou mira e trabounan positivo ku nos hóbennan ta hasiendo den bario.

Minister Hensley Koeiman i trahadónan sosial di ministerio Desaroyo Sosial, Labor i Bienestar (SOAW) ta felisitá e hóbennan di Kura Piedra, nan famia, Fundashon 1 Focus Diferente i tur sobrá instansia i personanan envolví den proyektonan, kaminda nos hubentut ta hasi kosnan konstruktivo i positivo den nan mes bario.

 

This site uses Akismet to reduce spam. Learn how your comment data is processed.

%d bloggers like this: