Diskurso nashonal aña 2020 di Promé Minister di Kòrsou

Diskurso nashonal aña 2020 di Promé Minister di Kòrsou

Geplaatst op 01 January 2020 dor di Ministerio Asuntunan General i Promé Minister

Awe, no solamente ta inisio di un aña nobo, pero tambe e prome dia di un dékada nobo.

Un dékada.., 10 aña.., por parse hopi, e por ta mustra leu, pero nos tur a yega di eksperiensiá kon lihé tempu por bula den kada un di nos bida. Diripiente…dianan ta sigui otro, bira lunas i den un fregá di wowo…un aña a pasa i 10 aña a pasa.

E realidat ku ta konta pa nos tur, no opstante ken nos ta i di unda nos a bini, ta ku bida…ta un kolekshon di momentunan chikitu, pero ku nifikashon grandi…kada unu yená ku eskohonan importante. Eskohonan ku ta influensiá nos bida personal pero tambe esnan rondó di nos.

Loke ta hasi sierto momentunan den nos bida mas memorabel i impaktante, ta ora nos ta konsiente i nos por sinti ku nos ta bibando un momentu di balor.

Awe riba e promé dia di un dékada nobo, esei ta mi yamada na abo. Tuma un momentu pa bo mes…pa fiha bo propósito i e kaminda bo dilanti. I hasiendo esei, reflehá tambe riba e aspirashon i soñonan pa bo pais den e 10 añanan benidero.

Unda bo lo ta den 2030? I ki soño lo bo a realisá pa bo mes i pa nos pais?

Awor mas ku nunka.. dilanti un dékada nobo, laga nos tuma un momentu:

• Un momentu pa nos reflehá riba kiko nos por laga atras. Ban laga atras tur lokual ta fomentá falta di komprenshon i ta hiba nos mas leu for di otro en bes di serka di otro, no opstante nos diferensianan di opinion i konvikshon.
• Prinsipalmente, ban laga atras miedu di kambio. Kambio ta garantisá, i nos por enfrentá esaki ku preparashon i kurashi òf nos por laga esaki sorpesá i destabilisá nos.
• Laga nos tuma un momentu, pa nos wak dilanti riba e próksimo dies añanan. Pa nos tribi di soña kon nos ta bai hasi nos vishon kolektivo i metanan komun realidat, pa nos mes i pa e siguiente generashon di Yunan di Kòrsou den futuro.

Mi sa kon difisil por ta pa mira horizonte den tur e turbulensia ku nos a i ta pasando aden. Mi sa ku e sirkunstansianan negativo fasilmente ta absorbá tur nos atenshon. Pero energia ta pa gasta na konstruí, nò pa sigui destruí.

Kasi 10 aña pasá, nos a bira un pais outónomo den reino i den e periodo ku a sigui nos pais a pasa den HOPI . Diferente reto i diferente krisis ku no ta nesesario pa mi detayá. Pero atrobe, kada momentu nobo ta unu di eskoho!

Ta na nos pa hasi eskoho i sigurá ku erornan di pasado ta bira nos mihó maestro den futuro.

Ta na nos pa kere den e potensial i fortaleza di e pais aki i ku optimismo sigui lucha pa e siguiente dies añanan ta mihó ku e lastu 10 añanan.

Ami ya ta mira e Kòrsou di 2030 mi dilanti: un komunidat fuerte ku hendenan ‘resiliente’, un nashon inovativo i próspero ku un futuro duradero! Un pais chikí den desaroyo den Karibe, ku tambe a sa di logra e metanan mundial di desaroyo, e SDGs, ku ta mas importante pa nos.

Awe, mi ta pidibo pa ban visualisá e Kòrsou di 2030 huntu ku mi:

Imagina’bo,…for di kurason di nos isla, nos haf Santa Ana, Kòrsou lo ta marka pauta komo un pionero den merkado marítimo i logístika, ku kompanianan renombrá bishitando nos wafnan pa motibu di nos ekspertisio i servisionan di kalidat haltu.

Den e Kòrsou di 2030, mei mei di Schottegat lo tin un refineria modèrno ku lo kumpli ku normanan di medio ambiente. Pa promé biaha den un era, portanan a habri pa un direkshon, un horizonte nobo, den Schottegat i na kosta di Bullenbaai. Areanan vibrante ku industrianan inovativo i duradero, por ehèmpel den energia renobabel. Schottegat lo tin skolnan kaminda nos hobennan por siña e fishinan di futuro, kompanianan ofresiendo trabou pa nos yunan di tera talentoso, espasionan kaminda nos por eksperimentá, krea, produsí i eksportá.

Den e Kòrsou di 2030, nos komunidat por kana i rekreá for di kosta di Marie Pampun, kual lo ta transformá ku un bulevar ku ta kore kantu di awe te na area di Piscadera, alabes reforsando nos kosta pa riesgonan di kambio di klima. Den area di ref lo tin un parke di pal’i mangel limpi kaminda nos komunidat por hasi ehersisio den un area saludabel. Banda di Ref, na Zakito, lo a kompletá un area ku lo konosé ‘cooling’ for di fondo di nos laman i e teknologia renobabel aki lo keda ekspandé na otro areanan bisendario.

Den e Kòrsou di 2030, nos sentro di suidat lo ta yen di bida i bibiendanan nobo. Na kosta di waf di Skalo a lanta un bida nobo i trendy, i den seno di Sint Elisabeth na Otrobanda, un distrito transformá lo vibra ku bibienda, wellness i arte.

Den e dékada nobo, turistanan lo sigui deskubrí i keda regresá Kòrsou. E aña aki nos porta aereo a keda renobá i awor ta kla pa sigui ekspandé konekshonnan i destinashonnan. Turistanan lo tin eskoho amplio for di un produkto turístiko i hotelero di kalidat muchu mas haltu i tambe un kantidat di hotèl nobo i renobá na nos kosta, den sentro di suidat, pero tambe na BandaBou den area di Santa Martha. Den 2 aña, Gabinete Rhuggenaath a fasilitá ku un kantidat rekòrt di mas ku 2500 kamber di hotèl.

Ku inougurashon di nos hospital nobo, nos lo habri un dékada kaminda nos ta bai sigui transformá nos sektor di salubridat i bira un destinashon rekomendá pa wellness i servisio médiko di kalidat i ku kompashon. Den 2030 nos hendenan ta mas konsiente kon pa kuida nan mes, kome i biba salú i prevení malesa. Nos barionan i kayanan lo ta limpi i nos tin leinan pa mihó maneho di nos awa i oséano. Lo tin mas kunuku i kunukito’s ku lo praktiká agrikultura modèrno rònt Kòrsou.

Na 2030, mas ku 5000 kas di famia di tur gremio, ku tin años ta warda, lo tin un espasio pa forma un hogar. Ya bou di Gabinete Rhuggenaath tin mas di 1000 kas bou di konstrukshon i ku e desishon resien riba Wechi nos lo mira e proyekto di 4000 kas aki tambe pronto bira realidat.

Tur e desishonnan i desaroyonan ku mi a menshoná aki, lo nifiká ku na 2030, nos lo a garantisá mas trabou i un bienestar próspero pa mas di nos ko-suidadanonan.

Konsiente ku tur e desaroyonan aki mester kana man den man ku invershonnan den E hende, kuminsando den 2020, nos lo bai hasi invershonnan den famia, bario i trabou ku reforma di e struktura di asistensia sosial general, mas oportunidatnan pa formashon den bario i mas guia i sosten na midí pa famianan vulnerabel. Den 2030 nos barionan i instansianan sosial lo ta mas kapasitá pa garantisá derechinan di nos muchanan, pa kombatí i prevení violensia i pa ta vehíkulonan ku ta empoderá i stimulá e forsa propio di nos suidadanonan pa nan sigui pa dilanti.

Pa yena kuponan di trabou di futuro, mester forma e edukashon di futuro. Esei ta bira e siguiente tarea prinsipal ku Gobièrnu, huntu ku komunidat mester bai duna kontenido na dje; kon nos ta moldia nos sistema edukashonal pa prepará nos hendenan ku e kompetensianan pa 2030 i despues. Tambe pa forma suidadanonan ku balornan i un sentido síviko i di identidat kompartí, orguyoso di nos diversidat i kultura riku.

I, no ménos importante, na 2030 abo komo suidadano mester tin siguransa den funshonamentu di bo Gobièrnu komo unu transparente i efisiente.

Esaki ta loke ami komo Promé Minister ta visualisá awe riba promé di yanüari 2020, i ku e vishon aki den mente nos di Gabinete Rhuggenaath lo sigui traha pa realisá un base sólido pa e Kòrsou di futuro.

Awe mi kier pidi abo, pa reflehá na e momentu krusial aki i pa visualisá bo aporte den e futuro kompartí di nos pais. Nos futuro lo keda determiná pa loke #huntu nos hasi i keda sin hasi awe. Komo suidadano, profeshonal, lider di bario, boluntario, hóben i adulto, e yabi di transformashon abo tin’e.

Ami a i semper lo sigui kere den nos potensial i mantené speransa den nos futuro. Pero potensial riba su mes no ta duna resultado. Speransa só no ta trese kambio. Nos mester ke, nos mester skohe p’e i nos mester traha p’e. Speransa ku akshon ta determinashon. Potensial kombiná ku vishon i determinashon, esei lo ta base pa transformashon.

Laga kada akshon for di aña nobo aki ta un refleho di e Kòrsou ku nos kier konstruí.

Un felis i prospero aña 2020 i un felis dékada nobo!