Plan di transishon pa garantisá kupo di trabòu te solushon pa IA
Jonathan Symor: plan urgente pa Kòrsou atendé IA
Plan di transishon pa garantisá kupo di trabòu te solushon pa IA
Invershon den prepara e hende ta primordial
Jonathan Symor, pa medio di frakshon di Trabou Pa Kòrsou den parlamento, a manda karta dia 22 yüni 2023 pa minister di Enseñansa i minister di BPD ku pregunta, kon gobièrnu di Kòrsou ta prepará pa introdukshon di Inteligensia Artifisial. Den un karta fechá
29 ougustus 2023, na pregunta number 1, minister di BPD ta kontesta ku a identifiká algun posibilidat i algun reto nan. Den e posibilidatnan a wòrdu menshoná ku lo por drecha servisio públiko. Tambe minister di BPB a menshoná algun reto manera: protekshon i siguridat di datos, dependensia di teknologia eksterno. TPK ta mira ku e ambtenaar ku su trabòu wòrdu remplasa dor di IA, no tin pakiko di drenta paniko.
Debi ku IA ta trese posibilidat pa trabòu nan nobo. Pues ta kuestion di transishon di ún trabòu pa un otro. Pues tur hende tene mente habri pa e desaroyonan inevitabel aki.
Paso ku introdukshon di IA, trabòu nan di “cyber security”, idioma di programashon, data input i “machine learing” lo kresé.
Den turismo IA lo por hunga un ròl grandi hasiendo nos isla mas amikal i seif pa e bishitante, dor di buta robot kiosk nan na sitio nan strategiko ku por interakta ku bishitante of e hende lokal respondiendo kualke pregunta den kualke idioma. Tur esaki nan sin kita e sabor dushi i kayente di nos hendenan ku ta guia turistanan tur dia.
Awor kiko lo pasa ku e ambtenar ku su funshon wòrdu mehorá dor di IA?
Trabòu nan manera: analista di data, servisio di kliente, reseptionista, telefonista, akountent i “teller” …poko poko lo bai stòp di eksistí di e manera ku nos konosé.
Esaki un bia mas ta trese un momentu ku TPK ta mira ku mester akopla nos enseñansa riba teknologia binidero, ku otro palabra, riba futuro, pa garantisá kupo nan nobo di trabòu ku lo bini i evita ku mañan Dios ke mester keda pidi pèrmit pa estranheronan bin traha, mientras e hende lokal ta keda sin trabòu. Tur esakinan pa garantisá ku den futuro nos hendenan mes por hasi trabòunan manera ariba menshoná i tambe idioma di machin, reparashon di outo elektroniko, energia bèrdè i renobabel, inteligensia artifisial i maneho di sushi of material desechabel i/of peligroso.
Tambe nos tin ku kòrda ku Parlamento tambe tin di traha lei pa e introdukshon di IA. No mester warda te ora esaki yega of te ora Hulanda imponé esaki na su manera.
Pasombra e por tin influensha negativo of por hasi malu uso di djé. Parlamento Europeo tin ún akto kaba kon IA lo wòrdu introdusí i husa.
Goldman Sachs, un instituto lider den finansiamentu Internashonal, a publika un tabél kaminda por mira okupashon di IA den kada sektor di trabòu.
Asina organisashonan por prepará pa e transishon inevitabel aki.
Den nos investigashon nos por a tuma nota ku IA lo remplasá trabòunan ku tin e karakter di ta repetitivo siendo ku trabòu nan ku ta eksigí e toke humano lo prevalese i lo huza IA komo un hèrmènt pa hasi e trabòu mucho mas efisiente manera, den sektor di kuido.
Un kos ta sigur,…. IA lo bai impakta kada ún di nos riba e mundo aki di un of otro manera, i nos mester ta prepará i bon informa pa atendé ku ne.
Pa mas informashon por tuma kontakto ku sr. Jonathan Symor na 528-0058.