Karta na minister Girigorie – Relashona ku uso di arma di kandela i hand granat

Pueblo di Kòrsou no ta sinti su mes sirbi i protehá, mirando e kantidat di arma di kandela den sirkulashon riba Kòrsou i awor te hasta “hand granat” ta wòrdu usa 

 

Na Minister di Hustisia

Señor Quincy Girigorie

PRESENTE

 

Willemstad, 14 di yanüari 2020

Tópiko: Pueblo di Kòrsou no ta sinti su mes sirbi i protehá, mirando e kantidat di arma di kandela den sirkulashon riba Kòrsou i awor te hasta “hand granat” ta wòrdu usa

 

Honorabel Minister Girigorie,                                                                                                                 

 

Frakshon di MFK a tuma nota ku den e promé siman di aña 2020, ya Kòrsou a konosé dos morto pa medio di arma di kandela i tambe un kaso kaminda a basha bala riba un kas i tambe a tira un “hand granat” den kura di e mesun kas aki. 

 

Abitantenan di Domi Abou mester a keda kasi tres (3) dia den tenshon wardando pa un eksperto bin for di afó pa desaktiva e “hand granat, ku e posibilidat ku e “hand granat” aki por a eksplotá i hasi daño na abitantenan. 

 

Komo representante di pueblo e susesonan aki ta trese preokupashon hopi grandi serka mi persona i tambe serka frakshon di MFK. Nos ta konstatá ku Minister no tin un maneho dirigí riba e aspekto di armanan ilegal ku ta drenta Kòrsou.

 

Esaki tin komo konsekuensia ku bida di siudadanonan di Kòrsou ta na peliger.

 

Nos no a skucha Minister sali i duna un deklarashon ofisial riba ningun di e tres kasonan ariba menshoná, ta komo si fuera ku asesinato i uso di arma di kandela a bira algu normal den nos komunidat i ku pueblo mester akseptá esaki. 

 

Frakshon di MFK ku semper a boga pa un Kòrsou Sano, Salu i Sigur, ta aserká Minister di Hustisia pa medio di artíkulo 96 di Reglamentu di Orden, ku siguiente preguntanan;

 

1. Minister  a tuma nota di e dos kasonan di asesinato ku arma di kandela den e promé siman di aña 2020 i tambe e kaso di tiramentu riba un kas na Domi-Abou kaminda a tira un “hand granat” den kura di e kas?

 

1. Minister ta haña ku ta korekto ku kuminsando un aña i un dékada nobo ta korekto pa e insidentenan aki tuma lugá i Minister di Hustisia no ta duna un deklarashon ofisial na pueblo i mustra ku den bo maneho no ta tolerá loke a sosodé?

 

1. Minister a tuma nota ku den pasado hasta a hasi uso di armanan outomátiko den algun asesinato?

 

1. Minister no ta haña ku e echo ku a usa un “hand granat”, ta algu ku mester wòrdu tuma hopi na serio i ku mester a manda un señal for di bo ministerio ku esaki ta algu inakseptabel?

 

1. Minister por informá Parlamento kua ta e maneho ku bo ministerio ta hiba pa kombatí armanan ilegal na Kòrsou?

 

1. Tin un indikashon di ki forma i/òf kon e armanan aki ta drenta Kòrsou?

 

1. Si kontesta na pregunta 6 ta afirmativo, kiko konkretamente a hasi òf lo bai hasi pa eliminá e posibilidatnan pa arma drenta Kòrsou?

 

1. Kòrsou no ta dispone di ningun profeshonal ku por desaktiva bòm òf “hand granat”.

 

1. Minister por informá Parlamento durante di e último sinku añanan ku a transkurí kuantu arma a wòrdu konfiská ku a trata na drenta kuné via di nos fronteranan marítimo?

 

1. Minister por informá kon e proseso pa registrá i warda e armanan ta tuma lugá?

 

1. Minister por informá Parlamento durante di e último sinku añanan ku a transkurí kuantu arma a wòrdu konfiská ku a trata na drenta kuné via di nos aeropuerto?

 

1. Minister por informá Parlamento durante di e último sinku añanan ku a transkurí kuantu arma a wòrdu konfiská den kontrolnan riba kaya òf den kas di siudadanonan?

Frakshon di MFK ta spera ku Minister Girigorie ta tuma bon nota di e di e karta aki i ku minister ta kontestá e preguntanan den e tempu stipulá konforme e protokòl firma entre gobièrnu i Parlamento di Kòrsou.

 

Atentamente,

 

___________________

Juniël Carolina

Miembro di Parlamento

Frakshon di MFK

 

Na: Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Kòrsou, 14 di yanüari 2020

 

Apresiabel Señor Cleopa, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Quincy Girigorie enkargá ku Hustisia, ku preguntanan ku mi persona ta hasi na e minister konserní.

 

Danki pa e koperashon.

 

Atentamente,

 

___________________                 

Juniël Carolina

Miembro di Parlamento

Frakshon di MFK