SOAW ta start projekto pa pone 500 hóben na trabou.

 

Kòrsou, 10 aprel 2022,

 

Djabièrnè 8 di aprel 2022 minister di Desaroyo Sosial, Labor i Bienestar, Ruthmilda “Mimi” Larmonie-Cecilia, a start e projekto piloto ‘É hóben, É relevo’.
E proyekto ta parti di un programa mayó titulá: “Reforma di ònderstant” den kuá lo akapará tur kobradó di ònderstant.

Manera konosí e vishon di minister Larmonie-Cecilia ta pa yuda mas tantu hende posibel pa drenta den e proseso laboral. Minister Larmonie-Cecilia a bishitá na Kas di Bario Punda kaminda a kuminsá ku e ‘in take’ i ‘assessment’ di hóbennan. E proyekto ‘É hóben, É relevo’ ta enserá ku lo invertí den e hóben pa tuma batuta for di su grandinan i sigui kana ku esaki. Lo krea perspektiva i futuro pa mas di 500 hóben ku ta risibí ònderstant. Lo analisá e puntonan fuerte, ménos fuerte i talento di e partisipantenan pa por siguí ku nan formashon i guia sosial, mientras ku ta start e parti di ‘on the job training’.

Minister Larmonie-Cecilia ke logra ekipá nos hóbennan pa por karga responsabilidat ku honor.
Durante e simannan ku ta sigui, tur hóben ku ta kobra ònderstant entre 18 i 30 aña, fo’i Banda ‘Riba te Banda Abou lo risibí un invitashon pa pasa na e ministerio pa un kòmbersashon i risibí informashon tokante e proyekto.
SOAW ta pidi kada hóben ku risibí un invitashon pa presentá na nan sita, debí ku esaki no ta un invitashon habrí.
Minister Ruthmilda Larmonie-Cecilia ta indiká ku esaki ta e komienso di un plan total pa reformá e ‘vangnet’ sosial, krea mihó kondishonnan riba tereno sosial i laboral pa hubentut i adultonan ku ta buska trabou.
Gobièrnu di Kòrsou tin komo lema “Un famia, Un bario, Un Pais’ i ta konsiente di e desafíonan ku tin relashoná ku aspektonan sosial-ekonómiko i finansiero di pais. No opstante esei, e minister ta komprometé pa sigui traha  di manera ku poblashon i spesialmente ku hubentut, por tin mas oportunidat pa formashon, edukashon i trabou. Finalmente minister Larmonie-Cecilia, ta gradesí tur empleado di SOAW pa nan aporte na e proejkto i bienestar di nos komunidat .