Según PIN: Parlamento di Kòrsou mester biba mas ku e pueblo.
Según PIN: Parlamento di Kòrsou mester biba mas ku e pueblo.
Partido Inovashon Nashonal (PIN) a keda asombra di a tuma nota ku Parlamento di Kòrsou den e reunion publiko di 8 di aprel ultimo ku a trata e konsepto di presupuesto pa 2023 a bai di akuerdo pa subi e presupuesto bèk ku 2.4mion.
Parlamento di Kòrsou ya pa 3 aña a baha nan presupuesto di 21.4 mion na 19 mion pa duna sosten na e pueblo ku ta pasando den momentunan di krisis.
Pero grandi tabata nos sorpresa di por a nota ku mayoria parlamentario a bini ku diferente motibu pa subi e montante bèk ku 2.4mion. Nos por a tuma nota kon entre algun di e argumentonan ku a bini dilanti, a trese ku tin falta di mas kolaborador di frakshon ku awor aki ta 2 i ke aumenta esaki na 4 pa frakshonan ku tin mas ku 4 asiento. Tambe a bini dilanti ku mester ku mester mas sèn pa tradusi leinan na papiamentu. I por a nota tambe ku a subi e post di opleiding i training. Pa nos esaki no ta kla si ta pa parlamentarionan of ku grefi tambe ta konta aden.
Ta insolito di por a nota reakshon di e parlamentarionan ku a mustra bon kla ku maske nos ta den un krisis mundial di Covid i guera na Ukraina ku ahinda nos a bin bèi di dje, ya kaba sin ningun sintimentu pa e pueblo a sali i pidi mas sèn pa nan funshoná.
Nos di Partido Inovashon Nashonal ke kòrda tur parlamentario ku no ta nan so a entregá. Mayoria di e servisionan di gobièrnu ta drai ku personal mínimo i tin ku hasi milaguer ku materialnan ku ta pone na nan disposishon. E pueblo ta enfrentá pèrdida di trabou i tur dia preisnan di alimentashon ta sigui subi i gasolin kasi inpagabel.
Partido Inovashon Nashonal ke hasi un apelashon serio na Parlamento pa deshasi di e desishon aki i biba poko mas tantu ku e pueblo.
