Kasonan di tráfiko den korte pa yanüari 2020:
Saka diabas di forma ilegal i infrakshon di tráfiko

Kasonan di tráfiko den korte pa yanüari 2020:
Saka diabas di forma ilegal i infrakshon di tráfiko

Djárason 15 di yanüari último a tuma lugá e promé kaso di tráfiko den korte. A trata vários infrakshon di tráfiko i tambe un kaso di medio ambiente. E kasonan mas remarkabel tabata e infraskhonnan di tráfiko ku morto den tráfiko komo resultado i un kaso di medio ambiente ku ta trata operashon di un lèntfel ilegal i kobamentu di diabas ilegal.

X-team ku ta konsistí di diferente ‘stakeholders’ di e diferente ministerionan i ku ta enfoká entre otro riba prevenshon, mantenshon di òrdu i investigashon di hendenan ku ta kousa shushedat a verbalisá un situashon di kobamentu ilegal di diabas na Groot Santa Martha. E sospechoso H.J. ku tin un lèntfel ilegal einan, ta sospechá di a koba diabas di forma ilegal den un área konservá i di a bende di e diabas aki. E fiskal di Ministerio Públiko a eksihí un but di 3000 florin. E hues a bai di akuerdo ku esaki. E desishon aki tin ku fungi komo un atvertensia na tur shòfur i doño di dòmtrùk. Trafikashon di diabas no por tuma lugá sin un pèrmit pa esaki. Shòfurnan i propietarionan di dòmtrùk mester kontrolá si esaki ta na òrdu promé, serka esnan ku ta duna nan e trabou.

Pasa outo i no bisti faha
Durante di e kaso di tráfiko, tabatin dos kaso di tráfiko grave ku tabata sentral. Riba 7 di aprel 2018 a tuma lugá un aksidente riba Winston Churchilweg, kaminda tabatin un dalmentu entre un outo i un otro outo ku tabata bini di banda kontrali. Den e aksidente aki e okupantenan di e outo di sospechoso a keda heridá. Un di e okupantenan a bin fayesé. E sospechoso E.A.J. a splika ku el a haña un ‘black out’. Fiskal di Ministerio Públiko a konsiderá ku esaki no ta kuadra i ku e sospechoso tabata purba pasa un otro outo. E fiskal a eksihí un kastigu di trabou di 200 ora i dos aña sin pèrmit pa kore outo, komo kastigu pa korementu di outo sin koutela ku un víktima morto komo konsekuensia. Lamentablemente, e persona ku a fayesé no tabatin un faha di seguridat bisti. Hues lo tuma desishon pa mas tardá 5 di febrüari 2020.

No duna preferensia i no bisti hèlmu
Banda di esaki, sospechoso S.M.W. a parese dilanti hues pa falta di dunamentu di preferensia i strobamentu di un krusada. Pa motibu di e infrakshonnan aki un motosiklista a kore bai dal den banda di outo di e sospechoso. E motosiklista a bin fayesé. Pa e korementu di outo sin koutela ku morto komo konsekuensia, e fiskal di Ministero Públiko a eksihí un kastigu di trabou di 200 ora i dos aña (kondishonal) sin pèrmit di kore outo, ku un periodo di prueba di tres aña. E motosiklista ku a fayesé, lamentablemente no tabatin su hèlmu bisti. Desishon di hues riba e kaso aki ta sigui pa mas tardá 5 di febrüari 2020.