MP preokupá ku tardansa di business case HNO

MP preokupá ku tardansa di business case HNO

 

E proyekto di Hospital Nobo Otrobanda, HNO, a Sali 

alrededor di 200 mion mas di loke a presupuestá na inisio di e proyekto.

Ta mas ku dos aña ku Gobièrnu a pidi un business case ku second opinion di Stichting Overheids Accountants Bureau, SOAB, riba e proyekto di HNO pa asina trese lus riba e suma total ku Curaçao Medical Center, CMC, a kosta pueblo di Kòrsou. 

Sine business case pueblo mester paga un suma di 100 mion florin èkstra sin sa ta na unda e plaka aki a bai.

Na vários okashon frakshon di MP a pidi e business case aki ku te ainda no ta riba mesa.

Ta e mes patronchi atrobe por konstatá kaminda e gobièrnu di PAR, MAN i PIN ta traha skondí tras di kortina ku plaka di pueblo, sin bin dilanti ku dokumentashon konkreto.

Den un reunion di Parlamento dia 4 di sèptèmber 2019 minister Camelia-Römer a kontestá ku e kolegio di supervishon finansiero, Cft, tin e business case.

Den e tratamentu di presupuesto 2020 minister Camelia-Römer di Salubridat, Medio ambiente i Naturalesa a bisa Parlamento ku Gobièrnu a duna un ‘vorskòt’ di 86 mion pa kompletá e suma di 200 mion èkstra. E minister a bisa tambe ku lo paga Gobièrnu e suma aki bèk na momentu ku e business case yega Cft i ku esaki na su turno akordá e fiansa di 100 mion ku Gobièrnu a pidi Hulanda.

E suma aki a keda korigí, esta ku ta trata di 68 i nò 86 mion, pa minister Jesus-Leitoe den e segundo tanda di e mesun reunion di Parlamento kaminda minister Jesus-Leitoe a remplasá minister Camelia-Römer, ku mester a sali pa biahe di trabou.

Si e business case no bini kla ta nifiká ku tur e miónes aki ku por a usa pa diferente nesesidat di pueblo a disparsé. Por ehèmpel por a invertí den material pa skolnan básiko di DOS i por a spar pueblo di e medidanan drakoniko ku últimamente e gobièrnu aki ta batiendo nos pueblo ku ne.

Por a komprondé for di medionan di komunikashon ku a kita 40 mion for di e suma di benta di UTS pa huntu ku e 68 mion sera e buraku di e 100 mion di HNO.

Esaki miéntras konforme e groeistrategie entradanan di benta di NV nan di Gobièrnu mester bai den Curaçao Development Institute, CDI, pa stimulá nos ekonomia.

MP ta haña inakseptabel ku te ainda no por responsabilisá e 100 mion aki i ta hasi minister Camelia-Römer e siguiente preguntanan:

 

  1. Parlamento por haña e business case di HNO ku second opinion di SOAB ku Gobièrnu a manda na sèptèmber 2019 pa Cft?
  2. Kua ta e suma eksakto ku Gobièrnu a duna komo vorskòt pa kompletá e suma di 200 mion?
  3. Den kaso ku Cft no akordá e business case, kiko lo pasa ku e voorschot risibí dor di minister i kon lo paga esaki bek na kaha di gobièrnu?
  4. Kiko ta esfuersonan ku minister a hasi konkretamente pa den 2 aña tempu logra finalisá i entrega e business case na Parlamento?
  5. Minister ta kompartí e opinion di frakshon di MP ku pueblo di Kòrsou tin derechi di sa kuantu, kon, ken i na unda e montante astronómiko èkstra pa kaba e HNO a sali?
  6. Minister ta kompartí e opinion di frakshon di MP ku e  tardansa aki di 2 aña pa kaba un business case primintí ta minimalisá e konfiansa den Reino Hulandes riba gobernashon di Gabinete Rhuggenaath?
  7. Kiko ta e paso nan konkreto ku minister ta tuma pa finalisá i entrega e Business case na Parlamentu mas pronto ku ta posibel?

 

Movementu Progresivo

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: