Area pa hasi Deporte i un area di Rekreashon na Casa Grandi
Willemstad, 17 di febrüari 2020
Presidente di Parlamento di Kòrsou
Señor W. Millerson
Wilhelminaplein # 4
PRESENTE
Señor Millerson,
Pa medio di e karta aki, hasiendo uso di artíkulo 96 di Reglamentu di Orden di Parlamento, mi kier pidi bo persona pa dirigí e karta athunto na Minister di VVRP, señora Zita Jesus-Leito.
Danki pa e koperashon.
Atentamente,
Juniël Carolina
Miembro di Parlamento
pa frakshon di MFK
Minister di VVRP
Señora Zita Jesus-Leito
PRESENTE
Kòrsou, 17 febrüari 2020
Tópiko: Area pa hasi Deporte i un area di Rekreashon na Casa Grandi
Apresiabel señora Minister Jesus-Leito,
Pa medio di esaki suskrito Juniël Carolina, miembro di Parlamento di Kòrsou pa frakshon di Movementu Futuro Kòrsou (MFK) ta aserka bo persona komo minister enkargá ku Tráfiko, Transporte i Planifikashon Urbano (VVRP) ku e siguiente preguntanan pa loke ta trata e proyekto pa deporte i un area di rekreashon Casa Grandi. Ta mas ku 3 aña kaba, ku ministerio di VVRP i Domein Beheer a inisiá e proyekto di deporte i un area pa rekreashon na Casa Grandi i segun e plan tabata tin fase 1, fase 2a i 2b i fase 3a, 3b i 3c.
Te na e momentunan aki suskrito a tuma nota ku na e kancha di mini futbòl a pone hèkwèrk nobo, a konstruí algun kancha di tènis, un plasa ku un superfisie kompletamente di baksteen kaminda personanan por rekreá i pa hasi ehersisio i tambe un pilar fuerte di betòn basta haltu. Komo miembro di Parlamento pa frakshon di MFK, mi persona a wòrdu pone na altura ku e proyekto no ta kla i ku ainda falta pa konstruí tres (3) kiosko kombiná ku sitio di parker pa vehíkulo, fasilidat sanitario, plantamentu di palunan pa sombra i tambe fasilidat di lus.
Konsiderá ku ya ta mas ku 3 aña e proyekto aki ta para i gobièrnu di Kòrsou no a duna ningun informashon motibu riba esaki. Konforme artíkulo 96 di reglamentu di órden suskrito ta aserka señora Minister Zita Jesus-Leito ku e siguiente preguntanan pa pueblo di Banda Ariba ta na altura i bon informá riba e proyekto aki i tambe risibí un aklarashon ki dia ta sigui ku e sobra fasenan di e Proyekto aki.
- Señora Minister ta na altura ku e proyekto di deporte i un area pa rekreashon na Casa Grandi ta wanta. ya pa mas ku 3 aña kaba?
- Señora minister por splika kiko ta e motibu ku e proyekto ta wanta òf pega?
- Señora minister ta na altura kon importante e proyekto pa un sentro di deporte i rekreo pa e área di Bándariba i bisindario ta?
- Señora Minister por informá Parlamento ku tin fondo pa terminá ku e proyekto aki na Casa Grandi?
- Si kontesta na pregunta 4 ta afirmativo, Minister por splika Parlamento ki dia ta sigui ku e proyekto na Casa Grandi?
- E area ku mester wòrdu desaroyo, ya ta dòrna ku hopi yerba i palu di wabi i tambe palu di Indju, ki dia señora minister ta laga kuminsá limpia i mantené e área aki limpi?
- Minister por splika Parlamento kiko e pilar haltu di betòn na e skina di Kaya Jose Anthonia i Kaminda Casa Grandi ta simbolisá?
- Minister ta na altura ku riba e plasa di rekreo mester bini un busto di Jose “Jo” Felipa i pa motibu ku e proyekto ta wanta, no por a pone e busto aki ainda?
- Minister ta na altura ku Jose Jo Felipa tabata un persona ku hasi hopi pa deporte i rekreo den área di Banda Ariba i ku no ta bale la pena duna Jose “Jo” Felipa un honor di pone e plasa na su nòmber?
Na nòmber di abitantenan di Banda Ariba, komo miembro di Parlamento pa frakshon di MFK mi ta spera ku e preguntanan ta wòrdu kontesta den e tempu akordá entre Parlamento i gobièrnu, mi ta terminá ku un saludo kordial.
Atentamente,
Juniël Carolina
Miembro di Parlamento
pa frakshon di MFK