Premier Evelyn Wever-Croes Pa prome biaha desde 2015 CAFT TA DUNA ELOGIO NA GOBIERNO DI ARUBA

Premier Evelyn Wever-Croes Pa prome biaha desde 2015

CAFT TA DUNA ELOGIO NA GOBIERNO DI ARUBA

 

 

Dianan 13 y 14 di februari, e College Aruba financieel toezicht (CAFT) tawata na Aruba pa un bishita cortico na unda cu nan a reuni cu e Gobernador di Aruba, Minister di Finansa, Xiomara Maduro, Minister di Husticia Andin Bikker y Conseho di Minister y Parlamento di Aruba. Remarcabel ta, cu CAFT pa prome biaha desde 2015 a duna elogio na Gobierno di Aruba pa loke ta trata e Presupuesto 2019.

 

CAFT: “E desaroyo di e maneho financiero hiba aña pasa ta mustra di ta mas faborabel di loke cu a wordo pensa den prome instante”. 

 

Prome Minister Evelyn Wever-Croes a indica cu tin puntonan di precupacion cu tanto Gobierno y CAFT tin ainda entre otro e Presupuesto 2020 y e Reforma Fiscal cu no ta cla ainda y esaki ta prioridad pa Gobierno. 

 

CAFT a subraya cu aña 2020 ta un aña importante pa Aruba mirando cu Gobierno di Aruba ta presupuesta un surplus. Banda di esaki, CAFT a duna recomendacionnan con pa sigui baha gastonan den 2021 y con pa atende cu e retonan di futuro pa loke ta trata SvB y AZV debi na e efectonan di vergrijzing riba e fondonan. 

 

“E reunion entre Conseho di Minister y CAFT tawata un bon reunion caminda cu e elogio di CAFT a wordo bon ricibi pa Gobierno di Aruba. Gabinete Wever-Croes ta tuma e maneho financiero di Pais Aruba hopi na serio pa asina crea mas bienestar y progreso pa nos pais”, Prome Minister a duna di conoce.

 

Den menos di dos aña y hayando un situacion financiero hopi malo causa door di e gobierno anterior, despues di decisionnan dificil, basa riba un vision, sacrificio, y compromiso pa saca Aruba for di e problema financiero, conhuntamente Gabinete Wever-Croes a hiba un maneho financiero responsabel. Esaki solamente por a wordo logra door di dedicacion y un maneho structural di un Gobierno serio y responsabel.

This site uses Akismet to reduce spam. Learn how your comment data is processed.

error: Content is protected !!
%d bloggers like this: