FFK KU ATENSHON SPESIAL PA NOS HENDE MUHÉNAN RIBA DJADUMINGU 8 DI MART DIA INTERNASHONAL DI HENDE MUHÉ!
FFK KU ATENSHON SPESIAL PA NOS HENDE MUHÉNAN RIBA DJADUMINGU 8 DI MART DIA INTERNASHONAL DI HENDE MUHÉ!
Manera ya ta konosí djadumingu awor, 8 di mart, ta dia internashonal di hende muhé. Manera sa ta e kustumber den e lastu añanan FFK ta pone atenshon spesial riba e dia aki mirando e kantidat grandi di damanan ku ta forma parti di e famia di futbòl. Nos damanan ta hunga un ròl sumamente importante den nos komunidat i p’esei nos tambe ke para ketu riba e dia tan spesial aki. Mas ku klaro FFK ta sigui enkurashá nos hende muhénan pa nan tambe práktika e deporte di futbòl p’asina engrandesé futbòl di dama aki na Kòrsou.
Den kuadro di esaki FFK ta organisá un partido amistoso entre nos selekshon nashonal di dama kategoria U-15 i e ekipo di dama di Hubentut Fortuna U-17. E partido aki lo tuma lugá riba djadumingu 8 di mart pa 3’or di atardi den Stadion Ergilio Hato promé ku e partidonan di Liga MCB Promé Divishon i e ta kompletamente grátis.
E promé 50 damanan ku akudí na e partidonan di Liga MCB Promé Divishon riba djadumingu, lo risibí un bunita rosa serka FFK komo muestra di apresio riba e dia di hende muhé.
Un yamada ta bai na tur amante di bon futbòl i spesialmente na tur hende muhé pa tei e wikènt aki den Stadion Ergilio Hato pa presensiá e tremendo partido amistoso di nos damanan ku tambe ta bai mustra kiko tur nan tin aden! Nos damanan ta konta ku bo apoyo i sosten!
For di awe FFK ta deseá tur hende muhé masha pabien riba nan dia!
6 mart 2020
