Minister Mc William a sinta ku stakeholdernan pa sondia posibel impakto ekonómiko di Coronavirus na Kòrsou

Minister Mc William a sinta ku stakeholdernan pa sondia posibel impakto ekonómiko di Coronavirus na Kòrsou

Geplaatst op 13 March 2020 dor di Ministerio Desaroyo Ekonómiko

WILLEMSTAD- For di algun dia pasá Minister di Desaroyo Ekonómiko, sra Giselle Mc William a plania un reunion preventivo tantu ku sektor turístiko komo sektor di komersio pa asina por a plania riba un aserkamentu ekonómiko i prepará pa ku e pandemia di COVID-19. Despues ku a drenta informashon ofishal di e promé kaso di Coronavirus na Kòrsou, Minister Mc William, a tuma desishon pa kombiná e dos reunionnan aki i a yama un reunion ekstraordinario ku tim di maneho di su ministerio i e diferente stakeholdernan. E reunion aki a sirbipa konhuntamente deliberá riba e impakto ku e asuntu aki lo por tin pa nos ekonomia i kiko ta e pasonan ku lo por tuma pa asina tene e situashon ekonómiko di nos pais mas tantu posibel bou di kontrol.

Konsiderando e ekonomia frágil di nos pais ta di sumo importansia pa, den un situashon kritiko manera esun ku nos ta konfrontá, mas tantu posibel uni forsa pa asina trata na mitiga e konsekuensianan di esaki.

Despues di a sigui desaroyonan internashonal rondó di e vírùs di Corona, nos tur por a komprondé ku tabata kuestion di tempu pa esaki toka nos pais. Mirando esaki ya pa algun luna kaba, Gobièrnu di Kòrsou a bin ta duna informashon konsiso riba e desaroyo di e vírus aki i pa loke ta trata e sektor ekonómiko minister Mc William ya a bin ta reuní ku diferente partner den e sektor pa por purba prepará debidamente riba esaki.
Manera a anunsiá previamente, e reunion ku a tuma luga aki ku stakeholdernan tabata un reunion ku en prinsipio ya tabata planeá den kuadro preventivo. Sinembargo situashon no a duna espasio pa esaki a sosodé promé.
E reunion aki a konta ku representashon di Kámara di Komersio, Asosiashon Internashonal di Bankeronan (IBA) i Asosiashon di Bankonan di Kòrsou (CBA), Curaçao Ports Authorities (CPA), SUVECO, Curaçao International Financial Services Association (CIFA) i tambe CHATA i Ofisina di Turismo. Mirando ku nos ekonomia ta hopi dependiente di turismo, ta komprendibel ku ta biba un grado di preokupashon serka e stakeholdernan kon Kòrsou lo bai atendé ku e konsekuensianan inevitabel di e pandemia aki. Sinembargo kada unu, tantu individualmente komo di forma kolektivo, ya ta tumando pasonan nesesario pa asina purba na minimalisá e konsekuensianan pa nos ekonomia. Diferente di e stakeholdernan a trese diferente proposishon dilanti kual minister Mc William a primintí di lo bai eksplorá mas a fondo pa asina por duna su sosten na realisashon di esakinan.
E industria ta premirá ku komo isla chikitu sin mas nos lo bai sinti efektonan ekonómikamente tantu a korto plaso komo kisas pa algun luna despues. Pero ta importante plania kon nos ta bai dil ku esaki komo pais. Tin hopi kompania na Kòrsou dependiente di turismo i komokiera e situashon aki lo trese sierto reperkushon finansiero kuné.
Minister Mc William a splika den e reunion aki ku komo minister e tin total komprenshon pa e grado di preokupashon ku ta biba serka e stakeholdernan i ku na sierto grado e ta kompartí esaki. Pero, Kòrsou na e momentunan aki mester a tuma medidanan drástiko pa por haña mihó bista di e situashon ku nos ta dil kuné i pa por atendé esaki debidamente. Si akaso ta nesesario, mas aleu lo reuní pa tuma desishon si lo mester suavisá e medidanan aktual. Pero e minister ketu bai ta keda reiterá ku sin mas bienestar general di nos pueblo tin prioridat den momentunan manera esaki.
Mientrastantu, e wèpsait di Gobièrnu ta kontené tur informashon balioso kon pa kuida di bo mes i bo famia i tambe tin numbernan di emergensia pa si akaso esakinan resultá nesesario. Sòru pa na tur momentu keda informá mediante e kanalnan ofisial di informashon i hasi loke ta na bo alkanse pa seguridat di bo mes i esnan rondó di bo.

Pa loke ta trata kontinuidat di e plannan pa trata na reforsá nos ekonomia, minister Mc William a palabrá di sigui sinta regularmente ku e stakeholdernan pa por mantené e situashon mas tantu posibel bou di kontrol i tene otro informá di kualke desaroyo.

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: