Suministro di energia ta keda garantisá enbista di e pandemia di Coronavirus
Suministro di energia ta keda garantisá enbista di e pandemia di Coronavirus
Geplaatst op 13 March 2020 dor di Ministerio Desaroyo Ekonómiko
WILLEMSTAD- Minister di Desaroyo Ekonómiko, señora Giselle Mc William, a reuní ku e sektor ku ta enkargá ku suministro di Energia pa pais Kòrsou. Esaki ta den kuadro di e situashon di e vírus Covid-19 i posibel efektonan ku e por tin riba suministro di koriente, awa, gasolin, diesel i gas pa pueblo.
For di e reunion a sali na kla ku tantu Curoil komo Aqualectra tin un plan di kontingensia deliniá ku ta garantisá e suministro di energia pa futuro. Esaki ta enserá ku e kompanianan su personal ta keda disponibel na momentu i si akaso yega asina leu ku e situashon di Coronavirus eskala.
Tambe e kompanianan a tuma medidanan pa asina minimalisá e posibel rísikonan ku ya a keda identifiká riba tereno energétiko. Ta trata aki entre otro di rísikonan riba tereno di higiena pero tambe seguridat.
Minister Mc William a keda satisfecho ku e diligensia i seriedat ku e kompanianan aki ta atendé ku e situashon. Na final di enkuentro Minister Mc William a palabra ku lo sigui monitereá e suministro di energia regularmente pa asina tene nos pueblo debidamente informá.
