MINISTER MADURO Y MINISTER ODUBER A REUNI CU MAYORISTANAN PRODUCTONAN DI PRIMERA NECESIDAD TA WORDO REGULA TEMPORALMENTE PA EVITA CONTAGIO
MINISTER MADURO Y MINISTER ODUBER A REUNI CU MAYORISTANAN PRODUCTONAN DI PRIMERA NECESIDAD TA WORDO REGULA TEMPORALMENTE PA EVITA CONTAGIO
Oranjestad – Diahuebs mainta Minister Maduro di Asuntonan Economico y Minister Dangui Oduber di Salubridad hunto cu expertonan di Departamento di Asuntonan Economico a reuni cu un grupo di mayorista na Aruba. Esaki ta un reunion pa brinda informacion riba e lista di productonan di primera necesidad cu Gobierno lo bay regula temporalmente. E meta di e regulacion aki ta pa tur hende por tin aceso na e productonan basico specialmente di higiena pa asina por enfrenta e reto cu COVID19 ta trece cune. Minister Maduro a informa cu e lista di e productonan aki no ta forma parti di e productonan den e Canasta Basico. Esaki ta un lista di extra productonan di primera necesidad cu ta wordo regula temporalmente. Despues di 3 luna Gobierno lo bolbe re-evalua e situacion y e lista di productonan.
Ta trata di e siguiente productonan: desinfectante pa uzo personal; handsanitizer, alcohol 70%, glacial y habon. Desinfectante domestico; productonan cu ta contene chloor, lysol y wipes, bebida cu ta contene electrolyten, papel di wc, ekipo di proteccion (masks, gloves), bruki pa baby, dried fruit, baby wipes, cornflakes plain, frozen fruits, frozen chicken whole legs y frozen chicken wings.
E mandatario a enfatisa cu ta importante pa den e situacion di crisis di COVID 19 cu Aruba ta aden, pa e consumidor por tin aceso na productonan necesario, entre otro, di higiena pa por preveni contagio.
Hunto cu e mayoristanan a yega na e acuerdonan necesario pa asina por yuda e comunidad na e mihor manera. A delibera tambe riba otro forma con mayoristanan hunto cu Gobierno por bay yuda comunidad pa enfrenta e crisis aki cu no conoce precedencia alguno.
Minister Maduro y Minister Oduber ta gradici tur mayorista pa nan contribucion positivo y ta desea nan y tur otro comerciante hopi forsa pa enfrenta e retonan nos dilanti. Como Pais, hunto nos lo logra surpasa e crisis aki.
