Servisio di Atmishon ta informá referente COVID-19

Servisio di Atmishon ta informá referente COVID-19

Geplaatst op 19 March 2020 dor di Ministerio Asuntunan General i Promé Minister

Den kuadro di e COVID-19, Servisio di Atmishon ta informá e siguiente kambionan pa garantisá seguridat di empleadonan i públiko en general.
Pa tene e distansia sosial mas tantu posibel, Servisio di Atmishon ta pidi nos usuarionan pa tene nan mes na e kambionan ku ta drenta na vigor entrante djaweps 19 di mart 2020.

Entrega di petishon
Servisio di Atmishon no ta risibí kliente personal na ofisina pa hasi entrega di petishon pa un estadia temporal, ekstenshon turístiko, restitushon i duplikado. Entrante djaweps 19 di mart 2020, lo tin un e-mail disponibel pa hasi entrega di e petishonnan menshoná, kual ta intake@immigrationcur.org. Pa tur otro informashon por manda un e-mail na info@immigrationcur.org. Uniko petishon ku por lo pronto no por keda entregá ta e prueba di regreso i partida definitivo. Esaki mirando ku tin restrikshon di biahe.

 

Eksigenshanan pa na momentu di entrega via e-mail:

• Tur dokumento mester ta di scan i den formato.pdf
• Mester kumpli ku e pago di leges & retributies
• E formulario di petishon mester keda yená elektronikamente i firmá pa e petishonario. Si dado kaso no por yen’é elektronikamente, preferibel yen’é den blòklèter ku pèn blou. E formulario ta optenibel via website gobiernu.cw.
• Na “subject” mester pone e nòmber i fecha di nasementu di e petishonario.
• Pa e petishon ta kompleto mester añadí un kopia di tur dokumento konforme e lista di eksigensha korespondiente na e tipo di petishon.

 

Na momentu ku manda e petishon via di e-mail intake@immigrationcur.org, si e petishon ta kompleto, ta risibí un komprobante via di e-mail ku a tuma e petishon den tratamentu.
Ora ku risibí karta di desishon i ku ta tuma e título di residensia, mester trese e dokumentonan original.

Petishon pa deklarashon van Rechtswege i Niet van Toepassing, ta sigui nòrmal via e website http://www.immigrationcur.org.

 

Otorgá título di residensia
Mirando e situashon pa ku COVID-19, por lo pronto no ta entrega e título di residensia (stèmpel) na e persona ku a risibí un título di residensia positivo. Pa ku esaki ta anunsia despues un fecha ku lo kuminsa otorgá título di residensia.

Apelashon
Tur usuario ku ke entregá un karta di apelashon riba e desishon por manda esaki na e-mail info@immigrationcur.org. Usuarionan ku mester a entregá mas dokumento komo parti di nan apelashon, por mail e dokumentonan na info@immigrationcur.org.

Customer Service Center
Pa tur informashon tokante referente un petishon hasí, por manda un e-mail na info@immigrationcur.org òf por bèl na 733-2000 òf manda un mensahe na e página di  facebook Toelatingsorganisatie Curaçao. No ta posibel pa hasi informashon personal na ofisina. E orario ku por yama i hasi informashon ta di 7:45 am pa 12:00 pm i 1:30 pm pa 4:00 pm.

Pa petishonnan prosesá, por subi riba e website di gobièrnu www.gobiernu.cw. Ora subi e website, n’e balki di buska ta tek petishonnan prosesa òf por uza e link aki https://gobiernu.cw/petishonnan-prosesa/.

Pa resumí, e-mailnan importante ta:
Pa entrega di petishon: intake@immigrationcur.org
Pa apelashon : info@immigrationcur.org
Pa informashon general: info@immigrationcur.org