Partido Kòrsou Esun Mihó a tuma nota di e prekupashon i te asta indignashon ku tin den pueblo pa loke ta trata salarionan gordo ku direktornan di entidatnan ligá ku gobièrnu, esta NV nan ta gana.

Partido Kòrsou Esun Mihó a tuma nota di e prekupashon i te asta indignashon ku tin den pueblo pa loke ta trata salarionan gordo ku direktornan di entidatnan ligá ku gobièrnu, esta NV nan ta gana.  Aki por papia di un asuntu ku pa vários aña ta hungando sin ku gobièrnu por a yega na un intervenshon pa stòp ku e abusu aki.

Na opinion di Partido KEM gobièrnu mester traha un proposishon di lei den kua ta duna gobièrnu e poder pa intervení den NV nan i otro entidatnan ligá ku gobièrnu kaminda tin salarionan desproporshonal ta wòrdu paga na direktor i trahadónanan, pa asina trese e salarionan aki na nivelnan mas hustu. Partido KEM ta boga pa den e proposishon di lei aki gobièrnu introdusí den e NV nan un sistema salarial manera ta usual den seno gubernamental. Esta, ku funshonnan den e NV nan i e otro entidatnan ligá ku gobièrnu mester ser deskribí i balorá segun e sistema den gobièrnu i e haltura di e salarionan no por ta mas ku esun vigente den e sistema di gobièrnu. Un proposishon di lei asina aki mester kana su kaminda normal pa na final ser tratá den Parlamento pa yega na un apoyo amplio konforme deseo di pueblo.

Awor, partido KEM ta konsiente ku e direktornan di NV i otro entidatnan ligá ku gobièrnu lo ta traha bou di kontrato i no ta asina asina ta kibra o kambia kòntrakt. Pero, ta opinion di Partido KEM ku tur e kontrato nan aki tin ku ser evaluá di nobo dor di gobièrnu. Tin un entidat ku yama SBTNO (Stichting Bureau Toezicht en Normering Overheidsgelieerde Entiteiten) ku por hasi e trabou i entregá proposishon pa gobièrnu. Si dado kaso no por kibra o kambia kontrato eksistente, ta keda e kaminda di Korte pa yega na un solushon ekitativo pa e direktornan enkuestion i gobièrnu, pues pa pueblo.

Segun Partido KEM por a komprondé ta te asta asina ku den pasado resién gobièrnu a bini ku proposishon di lei, den forma di un ordenansa di pais, den kua kier a intervení den e struktura di hasimentu di gastu den e NV i otro entidatnan liga ku gobièrnu. E proposishon aki a pasa Parlamentu, segun Partido KEM por a komprondé i a yega na Gobernador pa firma. E firmamentu aparentemente no a tuma lugá debí na preshon di entre otro sindikato. Esaki tabata un chèns ku a bai pèrdi pa por yega na kontrol di gastunan salarial den e NV nan i otro entidatnan liga ku gobièrnu.

Un otro asuntu den e kaso aki, segun Partido KEM, ta e bareranan ku e direktornan di NV i otro entidatnan liga ku gobièrnu por lanta pa stroba gobièrnu di intervení den struktura salarial o otro gastunan. Den pasado resién tabatin e kaso den Korte ku UTS a entamá kontra gobièrnu pa motibu ku Kontrolaria General riba òrden di gobièrnu mester a drenta UTS pa hasi sierto trabou di kontrol. Gobièrnu a pèrdè e kaso aki. Pa Partido KEM esaki ta algu insólito i ta na gobièrnu pa mas lihé ku purá hasi e kambionan di lei nesesario ku ta hasi posibel pa Kontrolaria General drenta den tur NV i otro entidatnan liga ku gobièrnu ki ora ku esaki ta nesesario.

Pa finalisá, Partido KEM ke sigurá pueblo ku e ta un partido ku ta sali na vanguardia di Pais Kòrsou i su habitantenan. No por ta asina ku aña aden aña afó abusonan manera salarionan eksorbitante den NV nan i entidatnan liga ku gobièrnu ta ser pagá, siendo ku kasi 30 porshentu di pueblo ta biba den pobresa grandi. Un situashon asina aki no por kontinuá i si pueblo duna Partido KEM e sosten nesesario, KEM sigur lo hasi tur esfuerso nesesario pa hustisia sosial reina den e pais dushi ku yama Kòrsou. Kòrsou sigur sigur ta e mihó si uni forsa pa hasi’é!