LOKÈT DI KOMUNIDAT NA SAMBIL TA SELEBRÁ SU DI DOS ANIVERSARIO

Willemstad – Djabièrnè, dia 2 di òktober 2026, Lokèt di Komunidat di Ministerio di Maneho di Gobernashon, Planifikashon i Servisio Públiko ta selebrá su di dos aniversario.

Dos aña pasá nos a habri nos portanan na Sambil ku un meta: trese diferente servisio di Gobièrnu mas serka di komunidat,  bou di un dak. Huntu ku nos partnernan i koleganan, nos ta hasi nos máksimo esfuerso tur dia pa brinda e mihó servisio posibel.

Den e último dos añanan, Lokèt di Komunidat a demostrá su balor i nesesidat. Akí por akudí fásilmente pa diferente produkto i servisio, manera:

• Deklarashon di Bon Kondukta (VOG)
• Pèrmit di Negoshi (Vestigingsvergunning)
• Pèrmit pa Horeca (Horecavergunning)
• Petishon pa Transporte Eskolar (Schooltransport)
• Pèrmit pa Puesto Fiho (Standplaatsvergunning)
• Pèrmit pa Puesto Ambulante (Ventvergunning)
• Aplikashon den kuadro di Lei di Transparensha (LOB)

Asina nos ta sigui garantisá un servisio aksesibel i efisiente pa sirbi ABO. Nos kier gradisí nos komunidat, klientenan i koleganan pa e sosten i konfiansa. Danki na boso, nos por sigui krese i mehorá!

Pa bishitá nos i hasi uso di nos servisionan, traha bo sita fásilmente via sita.gobiernu.cw.

Nos ta warda bo ku hopi plaser pa asistí bo.