“CBCS TA AHUSTÁ PROYEKSHON DI KRESEMENTU” E sakrifisionan ekonómiko di e lockdown ta supstansial pa e paisnan Kòrsou i Sint Maarten

April 23, 2020 REDAKSHON 0 Comments

“CBCS TA AHUSTÁ PROYEKSHON DI KRESEMENTU”
E sakrifisionan ekonómiko di e lockdown ta supstansial pa e
paisnan Kòrsou i Sint Maarten

Willemstad/Philipsburg – Centrale Bank van Curaçao en Sint Maarten (CBCS) a
ahustá su proyekshon di kresementu pa 2020 pa Kòrsou i Sint Maarten i siguiente
añanan. Den e proyekshon anterior CBCS a kalkulá e impakto ekonómiko di e
seramentu di fronteranan pa buelonan komersial i tráfiko marítimo, miéntras den e
proyekshon nobo efektonan di e lockdown tambe ta inkorporá. “A konsekuensia di e
lockdown e ekonomianan di Kòrsou i Sint Maarten, ku a keda severamente afektá pa
e seramentu di fronteranan, a keda praktikamente paralisá. Teniendo kuenta ku e
sakrifisionan ekonómiko di un lockdown ta supstansial, mester na un forma
responsabel, pero mas lihé posibel, reaktivá partinan importante di e aktividatnan
ekonómiko ku na e momentunan aki ta paralisá”, segun dr. Jose Jardim, presidente
interino di CBCS.
CBCS den luna di mart a kalkulá e efektonan ekonómiko di e seramentu di fronteranan di
Kòrsou i Sint Maarten pa buelonan komersial i tráfiko marítimo. E efektonan negativo ta
konsiderabel. Ku e seramentu di fronteranan pa un periodo di 3 luna sigui pa un
rekuperashon gradual despues ku nan habri bèk, Kòrsou lo registrá un kontrakshon real di
14,9%. Mientrastantu CBCS a ahustá e pronóstiko aki ku un 1,0 punto porsentual pa 13,9%
pa motibu ku e introdukshon di Impuesto General di Konsumo (ABB) no a tuma lugá mas
riba dia 1 di aprel. CBCS den su proyekshon nobo ta asumí ku esaki lo drenta na vigor riba
dia 1 yüli 2020. Pa Sint Maarten CBCS a pronostiká den mart un kontrakshon ekonómiko di
13,7% pa 2020 ku e seramentu di fronteranan pa un periodo di 3 luna siguí pa un apertura
gradual. E proyekshon aki a keda ahustá pa abou ku 1,2 punto porsentual pa 14,9%.
Mientrastantu e gobièrnunan di Kòrsou i Sint Maarten a alsa e medidanan di prekoushon kual
a resultá den un lockdown kompletu di tur dos pais. Mientrastantu na Kòrsou a suavisá e
medidanan un tiki, miéntras ku na Sint Maarten e lockdown e keda apliká mas resien. Pa motibu
di e lockdown kompletu e ekonomianan di Kòrsou i Sint Maarten ta praktikamente paralisá.
Basá riba e senario di e seramentu di fronteranan pa un periodo di 3 luna siguí pa un
rekuperashon gradual despues di e reapertura, CBCS a kalkulá e efekto di un lockdown pa un
periodo di 1 luna, 2 luna i 3 luna pa ámbos pais. “Den kaso di Kòrsou, e ekonomia lo kontraé
ku 17,7% ku un lockdown di 1 luna. Sinembargo, e kontrakshon ekonómiko por subi te na
25,4% ku un lockdown di 3 luna. E ekonomia di Sint Maarten tambe lo keda fuertemente afektá
pa un lockdown ku un kontrakshon di entre 17.0% (lockdown di 1 luna) i 21.1% (lockdown di 3
luna)”, segun dr. Jardim.
CBCS ta splika ku e kontrakshon na Kòrsou lo ta mas fuerte kompará ku Sint Maarten debí
na e inflashon mas haltu na Kòrsou i pa motibu ku na inisio a proyektá un kresementu na Sint
Maarten i un kontrakshon na Kòrsou. Ta antisipá un inflashon di 3.5% pa Kòrsou, miéntras
ta spera ku Sint Maarten lo registrá un inflashon di 2.3%. “E inflashon mas haltu na Kòrsou
ta debí na e rekargo ku gobièrnu a introdusí riba 1 di mart i 1 di aprel 2020 riba gasolin i
gasoil. E proyekshon aki tambe ta asumí ku lo introdusí ABB na yüli 2020. E oumento di
inflashon ta moderá pa un kaida fuerte di e preisnan internashonal di petroli. Pa motibu di
inflashon haltu, e poder di kompra lo baha i e posishon kompetitivo lo keda perhudiká”, di
akuerdo ku dr. Jardim. “Sint Maarten na e otro banda, lo benefisiá di e kaida di preisnan
internashonal di petroli, ku lo resultá den inflashon mas abou kompará ku Kòrsou”.
E presidente interino ta enfatisá ku e pronóstikonan ekonómiko aktualmente ta mará na
insertidumbrenan grandi. “Na e momentunan aki ta papia di un pandemia ku a kondusí na un
krísis ekonómiko mundial. Tin hopi riesgo negativo mará na e pronóstiko aktual, inkluyendo
trayektoria i durashon di e pandemia, e velosidat ku e medidanan restriktivo lo keda suavisá i
gradualmente redusí i kon aktividat ekonómiko lo rekuperá “.
Tambe ta asina ku mas largu e medidanan di prekoushon dura, e efekto negativo riba nos
ekonomia tambe ta bira mas grandi. E efekto negativo tambe ta dependé di kon lihé e
ekonomia ta rekuperá. “Mas largu e lockdown dura, ménos e partinan di ekonomia ku ainda ta
aktivo – for di punta di bista di solidaridat – ta kapas pa karga e aktividatnan ekonómiko ku a
para i ménos sostenibel e posishon di debe di e gobièrnu ta bira. Pa e motibu aki mester trata
pa na un forma responsabel, pero mas lihé posibel, reaktivá e partinan importante di
aktividatnan ekonómiko ku aktualmente ta paralisá”, asina dr. Jardim ta konkluí.