Frakshon di Movementu Progresivo Marilyn Moses: Preguntanan tokante alivio pa pueblo
Minister di Asuntunan General
Señor. Eugene Rhuggenaath
Fort Amsterdam 17
Presente
Willemstad, 22 aprel 2020
Tópiko: Preguntanan tokante alivio pa pueblo
Apresiabel señor Rhuggenaath,
Algun tempu pasa minister di Algemene Zaken a primintí pueblo ku e lo konektá tur kas bek riba ret di awa ku den pasado a keda deskonektá.
Despues direktor di Aqualectra a deklará ku e ta hasiendo areglo di pago pa konektá e kasnan konserní, esaki ta kontrario di deklarashon di minister ku a primintí otro kos.
Tambe nos ke pone atenshon riba e echo ku kedamentu na kas, manera gobièrnu a ordená, ta kosta pueblo mas koriente i NV GEBE, e kompania di awa i koriente di Sint Maarten a baha e tarifa di koriente konsiderablemente pa por lo ménos 6 luna, dunando asina un aporte enorme pa trese alivio na nan komunidat.
Tambe e kompania di awa i elektrisidat di Sint Maarten, NV GEBE, a anunsiá ku nan no ta bai deskonektá niun kas pa falta di pago durante di e krísis di COVID-19.
A base di lo kual nos ta menshoná ariba, fakshon di Movementu Progresivo ta hasi minister e siguiente preguntanan awe, 22 di aprel 2020:
- Kuantu kas ta tin deskonektá di awa na Kòrsou riba 1 di mart 2020?
- Kuantu kas a konektá kaba desde 1 di mart 2020?
- Kuantu kas falta pa konektá?
- Ki dia e proseso aki di konekshon ta planeá pa finalisá?
- Gobièrnu di Kòrsou ta bai duna instrukshon pa baha e tarifa di koriente manera na Sint Maarten a hasi?
- Si baha e tarifa aki, ta hasi esaki ku forsa retroaktivo desde promé di aprel di e aña aki?
- Gobièrnu ta bai duna un instrukshon pa Aqualectra no deskonektá klientenan ku den e periodo aki di krísis no a hasi nan pago di nan kuenta?
Atentamente,
Frakshon di Movementu Progresivo
Marilyn Moses
Na Presidente di Parlamento
- Millerson
Wilhelminaplein 4
Presente
Willemstad, 22 aprel 2020
Tópiko: Preguntanan pa Minister di Asuntunan General
Apresiabel señor Presidente,
Pa medio di e karta aki, hasiendo uso di artíkulo 96 di Reglamentu di Òrdu di Parlamento di Kòrsou, mi ke hasi e petishon na bo persona pa dirigié e karta athunto na Minister di Asuntunan General, sr. Eugene Rhuggenaath.
Atentamente,
Frakshon di Movementu Progresivo
Marilyn Moses
