Elsa Rozendal di MAN: Mester buska e fórmula pa enseñansa kontinuá mas tantu posibel i keda aksesibel pa tur mucha durante Covid-19
Elsa Rozendal di MAN: Mester buska e fórmula pa enseñansa kontinuá mas tantu posibel i keda aksesibel pa tur mucha durante Covid-19
Nos pais tambe ta konfrontando retonan pa ku Covid-19. Esaki a pone ku Gobièrnu a tuma medidanan pa salbaguardiá salú públiko i evitá ku e viro ta plama rápidamente bou di nos poblashon. Esaki a pone ku Gobièrnu entre otro a sera skolnan. Esaki tin komo konsekuensia ku nos muchanan no ta hañando lès. Òf a lo menos un gran parti di nos muchanan no ta hañando lès n’e momentunan aki.
Frakshon di MAN a tuma nota ku tin skolnan ku si a krea e infrastruktura nesesario òf tin e posibilidat pa sigui ku lèsnan di forma digital. Nos ta aploudí esaki pero alabes ke enfatisá ku esaki por trese un desigualdat enorme.
Enseñansa ta un derechi fundamental pa kada mucha i e Lei di Enseñansa ta bisa lo siguiente: “Dat betekent dat basisonderwijs voor ieder kind gratis beschikbaar moet zijn. De overheid moet er bovendien voor zorgen dat het voortgezet onderwijs en het beroepsonderwijs toegankelijk is voor ieder kind”.
Frakshon di MAN ta di opinion ku enseñansa mester ta aksesibel tambe durante Covid-19. Nos sa ku e no ta fásil pero ta di opinion ku mester ta kreativo i wak tòg posibilidatnan pa sigui ku enseñansa regular mas tantu posibel. Na Hulanda por ehèmpel ya Gobièrnu a tuma e desishon pa entrante di 11 di mei, laga entre otro skol di fundeshi kuminsá ku mitar di alumnonan den un klas i skol spesial ta 100% di alumnonan.
Alabes frakshon di MAN ke urgi minister pa tene kuenta ku e situashon di Covid-19, seramentu di skol i e lockdown di nos komunidat lo afektá funkshonamentu i prestashon di un kantidat di nos muchanan den e aña eskolar ku ta bini.
No solamentu ku hopi no por a sigui partisipá na enseñansa pa falta di rekesitonan digital, pero tambe pa e impakto sosial di mayornan ku a pèrdè trabou, angustia di por keda infektá i inseguridat pa un situashon ku nan no por kapta su enbergadura. E situashon aki a lo largo lo afektá prestashon di e alumno. Pa lei e mucha ku kuminsá su promé aña eskolar di enseñansa avansá por keda mandá un nivel mas abou(‘afstroming’) na fin di aña eskolar si e no a presta sufisiente. Lei ta bisa ademas ku ta solamente den kasonan singular e por keda sinta. Si tene na kuenta ku e konsekuensianan di Covid-19 a afektá funkshonamentu di alumnonan durante e aña eskolar aktual i lo afektá nan tambe sigur durante di e aña eskolar benidero, mester konsiderá Covid 19 un situashon ekstremadamente singular ku ta hasié hustu pa e alumnonan haña oportunidat pa ripití klas unu.
Nos kier pidi pa tene kuenta ku esaki i informá mayornan debidamente al respekto.
Den e kuadro aki parlamentario Rozendal a manda karta pa e minister pa pidi atenshon pa e aspektonan aki.
