Segun kalkulonan di CBCS Apesar di e redistribushon, e rekargo di solidaridat tin un efekto negativo riba nos ekonomia

Segun kalkulonan di CBCS Apesar di e redistribushon, e rekargo di solidaridat tin un efekto negativo riba nos ekonomia

Willemstad / Philipsburg – A petishon di minister di Finansa di Kòrsou, Centrale Bank van Curaçao en Sint Maarten (CBCS) a kalkulá e efektonan makroekonómiko di e rekargo di solidaridat (solidariteitsheffing). “For di e análisis aki por dedusí ku e rekargo di solidaridat, ounke ku parti di e rekursonan aki ta pa sostené algun di e gruponan vulnerabel i mas afektá di nos komunidat, lo kondusí na un kontrakshon ekonomiko pa 2020 aun mas grandi ku esun proyektá”, segun dr. José Jardim, presidente interino di CBCS. E ekonomia di Kòrsou a keda fuertemente afektá dor di e brote mundial di e vírùs di corona COVID-19 i e medidanan preventivo ku gobièrnu a tuma pa evitá plamamentu di e vírùs. A base di un seramentu di fronteranan pa un periodo di 3 luna i un lockdown di 1 luna siguí pa un rekuperashon gradual despues di e reapertura, CBCS tabata premirá ku ekonomia di Kòrsou lo kontraé ku 17,7% na 2020. Mester remarká ku mas e lockdown dura i e fronteranan keda será, mas grandi e kontrakshon lo ta.

“E kontrakshon fuerte di ekonomia lo resultá den un oumento di desempleo, más pobresa i empeoramentu di e finansa públiko. Promé ku e brote di e pandemia, Kòrsou ya tabata enfrentá desafionan sosioekonómiko i awor e situashon a deteriorá mas ainda”, dr. Jardim ta splika. “Mientrastantu, gobièrnu di Kòrsou a pidi sosten finansiero na Ulanda. Sinembargo, e promé parti di sosten di likides te ku mitar di mei ku a risibí ta konsiderablemente ménos di loke gobièrnu a pidi pa finansiá e medidanan di sosten. P’esei otro opshonnan mester keda eksplorá”.

Un di e opshonnan ku Kòrsou ta evaluá ta e introdukshon di un rekargo di solidaridat riba tur salario igual na òf mas haltu ku e límite di salario di e prima di ZV-OV pa aña 2020. Ta trata aki di un salario bruto mensual di NAf 5.771 òf mas haltu. Den su kalkulonan, CBCS ta asumí
un rekargo di solidaridat pa un periodo di 6 luna. “Ounke ku parti di e rekursonan aki ta pa sostené algun di e gruponan vulnerabel i mas afektá di nos komunidat, e rekargo di solidaridat lo tin un efekto prosíkliko riba nos ekonomia. Ku e implementashon di e impuesto por spera un kontrakshon mas fuerte di e ekonomia di 18,9%, emperorando aún más e proyekshon di 17,7%”, segun dr. Jardim.

E konsumo di e grupo ku ta paga e rekargo di solidaridat lo disminuí pa motibu ku nan entrada lo baha. Parti di e entrada di e rekargo di solidaridat lo wòrdu usá pa mantené kupo di trabou (i konsekuentemente retené e entrada disponibel) pa e grupo ku un entrada bou di e límite salarial. Gobièrnu tin intenshon pa usa e otro parti di e impuesto di solidaridat pa otro metanan, manera komplementá e reservanan di SVB, kompensá e pèrdida di entrada di gobièrnu i finansiamentu di e kostonan di implementashon di e pakete di solidaridat. Sinembargo, no tur grupo den nos komunidat lo bin na remarke pa e medidanan di sosten, lokual lo trese un bahada den konsumo. “Pues esaki ta trese un redistribushon apenas parsial di entrada di e grupo riba e límite salarial pa e grupo bou di e límite salarial. Esei ta splika e proyekshon ku konsumo privá lo baha pa motibu di e rekargo di solidaridat. Mas grandi e parti ta ku no ta wòrdu usá pa e redistribushon, mas grandi e efekto negativo riba nos ekonomia.” dr. Jardim ta splika.

Sinembargo, e entrada nèto di gobièrnu komo resultado di e impuesto di solidaridat, a base di un tasa di 10%, lo suma solamente NAf.67 mion. “P’esei no ta realístiko pa spera ku un ekonomia ku ya tabata den un reseshon durante di algun aña promé ku e brote, por generá fondonan supstansial pa kompletá e finansiamentu di e pakete di solidaridat,” segun e presidente interino. “Ta rekomendá gobièrnu, na lugá di introdusí un rekargo adishonal, eksplorá otro formanan pa baha gastunan di gobièrnu. E fondonan ku ta sali for di esaki por wòrdu komplementá pa e sosten finansiero adishonal di Ulanda i pa un montante limitá ku fiansa riba merkado di kapital lokal”. E rekursonan limitá ku ta disponibel pa finansiá e entradanan pèrdí pa motibu di e lockdown, ta rekerí ku na un forma responsabel, pero mas lihé ku ta posibel, reaktivá partinan importante di e aktividatnan ekonómiko ku aktualmente ta paralisá, di moda ku e gastunan di e lockdown por keda limitá i e rekuperashon ekonómiko por kuminsá”, asina dr. Jardim ta konkluí.

Willemstad, 3 di mei 2020 CENTRALE BANK VAN CURACAO EN SINT MAARTEN