Tremendo start di Curaçao National Export Awareness WeeK: edishon 2020 kompletamente virtual!

Tremendo start di Curaçao National Export Awareness WeeK: edishon 2020 kompletamente virtual!

Geplaatst op 18 May 2020 dor di Ministerio Desaroyo Ekonómiko

Willemstad- Djaluna 18 di mei Ministerio di Desaroyo Ekonómiko (MEO) a hasi inisio di e tres edishon di Curaçao National Export Awareness Week. E edishon di 2020 ta unu kompletamente virtual konforme medidanan di distansia sosial i seguridat debí na e pandemia di COVID-19. Por a opta pa kanselá e evento aki pero Ministerio di Desaroyo Ekonómiko den su afan pa keda trese kambio i inovashon, a skohe pa sigui ku e evento importante aki den kuadro di desaroyo ekonómiko di Kòrsou. Ku gran esfuerso e ministerio a logra realisá un siman di eksportashon kompletamente virtual ku un seri di webinars sumamente interesante duná pa oradornan tantu lokal komo internashonal. Edishon 2020 ta karga e tema di Services Export: the path to prosperity (eksportashon di servisio; e kaminda pa prosperidat). Pa realisá e edishon di e aña aki Ministerio di Desaroyo Ekonómiko a konta ku koperashon di e branding partners Grant Thornton i CINEX.

Durante e apertura di e siman di eksportashon 2020, Minister di Desaroyo Ekonómiko sra. Giselle Mc. William, a enfoká riba e aspekto ku nos tin ku konstruí un ekonomia mas diversifiká i fleksibel pa Kòrsou, e asina yamá ekonomia 2.0 (e 2.0 ta referí na e distansia sosial debí na COVID-19). Den esaki sektor públiko i privá lo tin ku kolaborá i traha mas estrecho huntu. Den su presentashon sra. Mc. William a indiká ku no opstante nos ta den un krísis debí na pandemia di COVID-19, komo pais den desaroyo nos a logra adaptá i trese vários inovashon den manera ku nos ta operá. Finalisando sra. Mc. William a enfatisá ku maske Kòrsou aktualmente ta sera debí na e vírùs di COVID-19 , nos ta habri ketu bai pa sigui hasi negoshi. Despues sra. Vanessa Toré ku ta direktor di e departamento di koperashon ekonómiko ku eksterior, di Ministerio di Desaroyo Ekonómiko di Kòrsou, a sigui ku e introdukshon i presentá e oradornan internashonal ku tabata sra. Dorothy Tembo ku ta Direktor Ehekutivo suplente di International Trade Center (ITC) na Suisa, sr. Anton Said ku ta hefe di e departamento di desaroyo di strategia di komèrsio di ITC i sr. Jasmeer Virdee ku ta un ekonomista i eksperto riba e área di komèrsio di ITC.

Ta bon pa indiká ku Kòrsou aktualmente ta trahando riba un strategia nashonal di eksportashon (National Export Strategy/NES) i resientemente dia 22 di aprel último Konseho di Minister a aprobá e promé paso pa yega na esaki via di aprobashon di e Strategic Trade Development Roadmap’. Esaki ta un guia stratégiko pa desaroyo di un Strategia Nashonal di Eksportashon. Na inisio di e siman di eksportashon a presentá di forma ofishal e Strategic Trade Development Roadmap aki. Huntu ku esaki a establesé i presentá tambe di forma ofishal e Curaçao Export Council ku ta e órgano ku lo duna guia i implementá e guia stratégiko pa desaroyo di un Strategia Nashonal di Eksportashon.

Den oranan di mèrdia a sigui ku otro presentashonnan riba temanan interesante manera kon por fasilitá komèrsio intra-Karibe via di E-commerce. Akinan di forma digital representantenan di CARICOM, Repúblika Dominicano i Kòrsou a deliberá riba maneranan kon por bira un region di E-commerce i stimulá komèrsio i negoshi intraregional.

Despues den oranan di atardi/anochi a sigui un webinar kaminda representantenan di sektor di turismo di Kòrsou a duna un bista kon e sektor aki a keda afektá dor di e pandemia di COVID-19 i di ki manera i riba kua término lo por rekuperá e sektor turístiko di Kòrsou.

Ainda bo por registrá pa e otro seshonnan den e siman di eksportashon i debí ku e ta kompletamente virtual bo por sigui esaki for di komodidat di bo ofisina òf kas. Pa mas informashon i registrashon pa e Curaçao National Export Awareness Week (CNEAW) subi riba e página di Facebook, http://www.facebook.com/neawcuracao.