Pronóstiko di tempu pa Kòrsou i bisindario bálido te djaweps mainta 06:00 o.l., 21 di mei 2020.

Pronóstiko

Pronóstiko di tempu pa Kòrsou i bisindario bálido te djaweps mainta 06:00 o.l., 21 di mei 2020.
Kompilá: djárason 20 di mei 2020, 05:00 o.l. (09:00 UTC).

KÓDIGO HEL: PREKOUSHON PA LAMAN BRUTU.

Tempu: Parsialmente nublá i tempu seku lo prevalesé awe. Durante di anochi pa mañan mainta, hopi nublá ku chèns pa algu di áwaseru.

Temperatura máksimo lo alkansá 32ºC i temperatura mínimo 27ºC.
Solo ta sali 06:11 i ta baha 18:54 o.l.

Bientu: Generalmente ost i moderá te basta fuerte; forsa 4 te 5 (20 te 39 km/ora, 11 te 21 nudo). Ráfaga de bes en kuando fuerte; forsa 6 (40 te 51 km/ora, 22 te 27 nudo).

Situashon general: Durante di próksimo 24 ora no ta antisipá desaroyo di nubianan signifikante riba nos region. Pa e motibu aki, un wer generalmente seku lo sigui prevalesé riba Kòrsou. Sin embargo, un ola tropikal aserkando nos área lo pèrkurá pa un oumento di humedat durante di awe anochi pa djaweps mainta i esaki por okashoná poko mas nubia, for di kua por kai algu di áwaseru. Mas aleu, e stòf di Sahara den nos área lo bira gradualmente ménos i komo resultado e bista lo mehorá. Tambe, bientu lo bira gradualmente ménos.

Kondishon di laman: Moderá te lokalmente basta brutu ku altura di olanan entre 1.5 i 2.0 meter (4 i 7 pia). E olanan di mas haltu lo ta den zona nan na nort i ost di Kòrsou. Ta pidi nabegantenan di boto chikí pa ta kouteloso i no alehá muchu di kostanan. Gradualmente laman lo bira un poko mas kalmu durante di awe.

Fenómeno spesial: Ningun.

Perspektiva te djabièrnè mainta: Parsialmente nublá i no ta antisipá áwaseru signifikante.

Meteorólogo: Rombley.