Agreshon kontra bombero durante asistensia na Koraalspecht

Agreshon kontra bombero durante asistensia na Koraalspecht

Djarason 20 di mei anochi, despues ku Brantwer a risibí notifikashon ku tabatin un bola di shushi na kandela na kaya Mochila, personal di Brantwer a dirigí nan mes konforme nos prosedura na e sitio pa kombatí e kandela. Yegando na e sitio personal di Brantwer a keda ataká ku piedra i otro ophetonan for di diferente ángulo. Esaki tabata di tal indulé ku no tabata posibel yega serka pa kombatí e kandela sin asistensia di polis.

Un situashon di peliger kompletamente no nesesario, kaminda e piedranan a alkansá tantu e personal komo e vehíkulo di paga kandela di Brantwer. Mas despues Brantwer a risibí
notifikashon ku tin kandela na diferente parti den Bario di Koraalspecht i asta tabata tin kas i ‘container’ na kandela.
Mester bisa ku esaki no ta prome bia, ku aktonan asinaki ta sosode ku nos personal kual ta algu ku Brantwer ta kondená.

Nos personal ta konsistí di siudadanonan dispuesto na riská nan bida na momentu di peliger pa sigurá bienestar di tantu hende komo bestia. Esaki ta un responsabilidat ku nos bomberonan a tuma konsiente i ku orguyo pa ku nan trabou i nos pueblo.

Loke no ta aseptabel ta e komportashon abusivo, ku inesesariamente ta eksponé bida di nos personal na peliger, ku konsekuensia ku siudadanonan ku ta dependé di nan asistensia tambe ta kore peliger. Un bola di shushi ku no keda atendé ku e deligensia nesesario, por kosta bida di hende i/ òf bestia i tambe kondusí na daño na material grandi. Kada sekònde ta balioso pa por duna un asistensia efektivo.

Tambe mester remarká ku nos vehíkulo i materialnan ta invershonan sumamente kostoso. Daño hasí na esakinan inesesariamente ta gastu inesesario pa gobiernu, esta e pueblo di Kòrsou.

Hasiendo uso di e medio aki nos ta spera di por a konsientisá pueblo di Kòrsou ku aktonan asinaki no ta keda aseptá pa Brantwer ken tin di garantisá seguridat di su personal na promé lugá. Nos ta konta di por risibí e koperashon nesesario pa Brantwer por sigui asistí nos dushi pueblo di Kòrsou.

This site uses Akismet to reduce spam. Learn how your comment data is processed.

error: Content is protected !!
%d bloggers like this: