Di tres edishon di Curaçao National Export Awareness WeeK; Un siman sumamente eksitoso!

Di tres edishon di Curaçao National Export Awareness WeeK; Un siman sumamente eksitoso!

Geplaatst op 26 May 2020 dor di Ministerio Desaroyo Ekonómiko

Willemstad- For di djaluna 18 di mei te ku djabièrnè 22 di mei último, Ministerio di Desaroyo Ekonómiko (MEO) a bolbe tene e Curaçao National Export Awareness Week. E aña aki ta di tres aña konsekutivo ku ta dediká e di tres siman di mei na konsientisashon riba eksportashon. Lokual tabata un inovashon kompletu e aña aki, tabata e echo ku a disidí di hasi e edishon di 2020 unu kompletamente virtual konforme medidanan di seguridat i distansia sosial ku a keda instituí riba nos isla a konsekuensia di COVID-19.

Tema di e edishon 2020 tabata: Services Export: the path to prosperity (eksportashon di servisio; e kaminda pa prosperidat). Pa por a realisá e edishon aki, MEO a konta ku koperashon di e branding partners Grant Thornton i CINEX. Ku masha satisfakshon MEO por mira bèk riba un resultado realmente impaktante mirando ku mas di 1.000 persona a partisipá aktivamente na e diferente seshonnan ku tabatin durante henter e siman via di e plataformanan digital manera entre otro Zoom, Facebook i Linkedin. E videonan ainda ta aksesibel riba Facebook di Ministerio di Desaroyo Ekonómiko i Curaçao National Export Awareness Week i pronto lo ta aksesibel riba wèpsait di MiNegoshi tambe.

Durante e promé dia ya a hasi lansamentu di tres inisiativa sumamente importante ku lo yuda fasilitá eksportashon pa Kòrsou. Ta trata aki di entre otro e ‘Strategic Trade Development Roadmap’ ku ta un guia stratégiko pa desaroyo di un Strategia Nashonal di Eksportashon. E guia aki a keda aprobá dia 22 aprel pa Konseho di Minister pero a lansá esaki ofishal durante e siman di eksportashon aki. Tambe a establesé i presentá di forma ofishal e Curaçao Export Council ku ta e órgano ku lo duna guia i implementá e guia stratégiko pa desaroyo di un Strategia Nashonal di Eksportashon. Durante e webinar di mèrdia ku e título “Facilitating Intra Caribbean Trade through E-Commerce”, partisipantenan ku tabata konsistí di representantenan di  CARICOM, Repúblika Dominikana i Kòrsou di un forma masha dinámiko i spontáneo, a pone nan mes di akuerdo i a lanta un Task Force ku lo bai traha riba un plan di akshon pa stimulá i atendé di un manera mas efektivo ku E-commerce den nos region. E task force aki lo keda kordiná pa Ministerio di Desaroyo Ekonómiko.

Durante e siman a trata otro tambe tópikonan manera e proseso ku Kòrsou ta kanando pa bira un miembro independiente di World Trade Organization (WTO) i a mustra kiko ta tur e benefishinan ku esaki por trese pa Kòrsou. E ofisina di Grant Thornton tabatin vários webinar interesante i práktiko ku a toka temanan manera kiko ta e faktornan di éksito i kiko bo tin ku tene kuenta kuné komo empresa ora ta trata e áreanan finansiero i di impuesto den kuadro di eksportashon. Grant Thornton nan a duna tambe un bista kiko ta e aspektonan teknológiko i stratégiko ku por fasilitá bo empresa pa krea un base na Kòrsou generando entradanan for di eksterior.

Otro inisiativa ku a keda lansá durante e siman di eksportashon di e aña aki tabata e echo ku lo bai rebibá Kòrsou su maneho di kalidat. Ya e ingredientenan pa esaki tei kaba i Ministerio di Desaroyo Ekonómiko lo fasilitá e proseso pa esaki bira operashonal mas pronto ku ta posibel.

Riba e delaster dia a lansá e inisiativa ku yama ‘Path to Markets’, ku a hasi hopi impakto serka e partisipantenan debí na su potensial inmenso ku esaki tin. ‘Path to Markets’ ta un instrumento kaminda empresanan mikro, chikí i mediano lo por haña tur informashon, training i sosten pa asina nan por drenta e merkado di Repúblika Dominikana i otro paisnan den Karibe. E servisionan di ‘Path to Markets’ lo ta di un karakter duradero i ta keda trese di manera digital i inovativo, adaptá na e nesesidatnan spesífiko di bo empresa. E servisio aki lo kuminsá dia 15 di yüni benidero i kompanianan por partisipá kompletamente grátis via e wèpsait http://www.pathtomarkets.com.

Pa finalisá e siman a sera ku e parti di industria kreativo kaminda nos propio entreprenuernan, artistanan i ekspertonan a elaborá ampliamente riba e industria kreativo di Kòrsou for di e ángulo di moda, artesania, pelíkula/sine i músika i kon esakinan tur tin sufisiente potensial pa por keda desaroyá komo un sektor di eksportashon.

Ministerio di Desaroyo Ekonómiko ta hopi gradisí na kada partisipante, moderadó i presentadónan tantu lokal komo internashonal ku a duna di nan tempu i ekspertisio pa hasi e siman aki unu sumamente eksitoso. Ademas un danki tambe ta bai na e branding partnernan CINEX i Grant Thornton.

Pa mas informashon i tambe pa resúmennan breve di e diferente webinarnan ku a tuma lugá durante e siman di Curaçao National Export Awareness Week, por subi riba e página di facebook page di Curaçao National Export Awareness Week i tambe riba http://www.minegoshi.org/export.