Tópiko: Klaridat pa hóbennan ku tin ku bai studia e aña aki den eksterior

Minister di OWCS

Señor E. Rhuggenaath
PRESENTE

Kòrsou, 27 di mei 2020

Tópiko: Klaridat pa hóbennan ku tin ku bai studia e aña aki den eksterior

 

Señor Minister Rhuggenaath,

 

Ta reina hopi preokupashon serka mayornan i nos hóben bekadonan ku tin ku sali pa un estudio den eksterior. E destinashon tradishonal pa ku estudio den eksterior ya pa desenionan kaba ta Hulanda. 

 

Manera ta konosí Hulanda tambe a wòrdu afektá pa COVID-19, ku un kantidat espantoso di hendenan ku a wòrdu afektá i ku a fayesé. Ekspertonan Virologo di e instituto nashonal na Hulanda (Rijksinstituut Volksgezondheid en Milieu-VRIM) na diferente okashon a atvertí pa un di dos ola di COVID-19 entrante luna di òktober di e aña aki, ku ta konosí komo e periodo di HERFST pa bai drenta WINTER ku ta un periodo di temporada friu i ku ta un temporada ku hopi hende ta haña grip.

 

Suskrito ta komprondé e preokupashon alarmante di hopi mayor di nos hóbennan kandidato bekado, ku kier klaridat riba nan futuro i kiko lo pasa pa ku nan futuro estudio. E instansianan konserní manera SSC i Ministerio di Enseñansa, tin ku suministrá informashon na e hóbennan aki i asina nan sa kiko ta wardanan.

 

Ku otro palabra Minister mester hasi mas pronto posibel un anunsiá ofisial na e hóbennan, pa nan sa si nan ta bai studia na Hulanda i/òf un otro kontinente fin di yüli, kuminsamentu di ougùstùs próksimo i tambe kon lo protehé nan kontra di COVID-19.

 

Pa e motibunan ariba menshoná, frakshon di MFK ta aserka Minister di OWCS, konforme artíkulo 96 di reglamentu di Orden, ku e siguiente preguntanan relashoná ku e proseso pa habri skolnan bek;

 

1. Ta e intenshon di gobiernu di Kòrsou pa manda studiantenan bai studia den eksterior e aña aki, sigur teniendo na kuenta ku e Pandemia di COVID-19?

 

1. Si kontesta na pregunta number 1 ta afirmativo, Minister di Enseñansa por informá Parlamento ku SSC a hasi e preparashonnan teniendo kuenta ku COVID-19, pa studiantenan por biaha pa eksterior pa nan estudio?

 

1. Minister di Enseñansa por garantisá si SSC a hasi e preparashon di forma responsabel pa ku “opvang” di nos bekadonan na Hulanda?

 

1. Minister di Enseñansa por garantisá si e infrastruktura di estudio na nivel tersiario (HBO i o WO) avansá por akapará alrededor di 400 pa 500 hóben studiante lokal èkstra for di normal?

 

1. Minister por informá ku e studiantenan ku a aña pasa a bai studia a logra di haña kamber òf un otro alohamentu pa asina por tin kamber disponibel pa esnan ku mester biaha e aña pa  Hulanda por dispone di un kamber?

 

1. Minister por informá kuantu hóben lo mester biaha e aña aki pa kontinuá ku nan estudio den eksterior? 

 

Nos ta spera kontesta di Minister Rhuggenaath den un término korto lo kontesta nos preguntanan pa asina por tin klaridat riba e situashon aki.

 

Atentamente,

      

 

Gilbert Doran

Parlamentario