Prome Minister Evelyn Wever-Croes: PROME MINISTER A DUNA SPLICACION AMPLIO DEN PARLAMENTO TOCANTE E MANEHO DI GOBIERNO DEN E CRISIS COVID-19: Diaranson mainta Prome Minister Evelyn Wever-Croes y Minister di Cultura, Finansa y Asunto Economico tawata den Parlamento pa duna splicacion tocante e maneho di Gobierno den e crisis COVID-19. 

Prome Minister Evelyn Wever-Croes:

PROME MINISTER A DUNA SPLICACION AMPLIO DEN PARLAMENTO TOCANTE E MANEHO DI GOBIERNO DEN E CRISIS COVID-19:

Diaranson mainta Prome Minister Evelyn Wever-Croes y Minister di Cultura, Finansa y Asunto Economico tawata den Parlamento pa duna splicacion tocante e maneho di Gobierno den e crisis COVID-19. 

 

Prome Minister a habri su discurso splicando e trayectoria di Covid-19 desde 13 di maart dia cu Aruba a conoce su prome caso di COVID-19 pa actual. Gobierno di Aruba inmediatamente a tuma e decision di bin cu medidanan drastico pa asina evita e virus aki di sigui plama. Den e prome 3 simannan tawatin un crecemento rapido di 0-71 caso positivo.  Danki na e decisionnan tuma a logra di frena e crecemento aki y despues di e 3 simannan e curva a cuminsa baha ya cu tawatin menos caso y mas hende a cuminsa recupera. Finalmente dia 28 di mei, e ultimo persona cu tawata tin COVID-19 a test negativo treciendo asina e total di caso positivo na 0. Gobierno ta consciente cu Aruba lo por conoce casonan nobo y ta prepara pa por atende cu e casonan aki si nan presenta. 

 

Prome Minister Evelyn Wever-Croes: “Un elogio sigur ta bay na e team di calamidad pa nan profesionalismo pa cu maneho di e crisis aki. Aruba tawata prepara adelanta y a tuma e decision cu en caso e virus aki yega lo cuminsa cu e strategia di test agresivo; “search and destroy” manera e terminologia uza ta. E strategia aki a exigi no solamente planificacion sino tambe fondo ya cu mester tawata tin e testnan aki adelanta pa por cumpli cu e esaki debidamente. Compara cu e otro paisnan, awe Aruba ta un di e paisnan cu e testmento per capita di mas halto. 

 

Aruba como un pais propio tawata tin e ventaha di bin cu su mesun strategia y no manera e islanan BES cu ta un municipio di Hulanda cu mester a sigui e mesun strategia cu Hulanda.  Nan no tawata tin e strategia di test agresivamente cu ta esun cu a yuda Aruba hopi den combati e plamamento di e virus na un manera satisfactorio. 

 

Danki tambe na e situacion financiero cu Gabinete Wever-Croes a sa di maneha na un manera responsabel e ultimo dos añanan aki, cu awe tawata tin fondo disponibel pa por a busca tur e testnan prome cu e crisis a alcansa nos isla. 

 

E crisis di COVID-19 no tawata solamente un crisis di salud sino e tawata crisis den crisis. E tawata un crisis di salud cu a ser maneha debidamente, un crisis financiero na unda Aruba a perde su entradanan principal, un crisis economico ya cu nos pilar economico a cay y crisis den orden publico y social. Tambe Gobierno a hañe den manifestacionnan na unda a sali duna cara pa splica e situacion cu Aruba ta den den tur transparencia. 

 

Esaki ta prome biaha den historia cu Aruba a enfrenta un crisis di e magnitud aki pero mescos cu tur otro crisis semper a sa di lanta cabes. Nos Arubianonan ta hendenan sin miedo y a enfrenta e crisis aki cu determinacion y curashi cu inspiracion di esnan prome cu nos cu a sa di engrandece e pais aki sin miedo. 

 

Gobierno di Aruba a ricibi hopi elogio no solamente localmente sino tambe internationalmente pa e manera con a maneha e crisis den crisis aki y esaki no por a wordo logra sin e cooperacion di e comunidad di Aruba cu a sa di sigui e reglanan cu disciplina manera stipula pa Gobierno. Ta danki na tur e esfuerso di no solamente Gobierno di Aruba sino tambe di e profesionalnan y di nos comunidad cu awe Aruba tin e virus aki domina”.