Reapertura sektor turístiko Gran prospekto turístiko pa reapertura di frontera

Reapertura sektor turístiko

Geplaatst op 30 June 2020 dor di Ministerio Desaroyo Ekonómiko

Gran prospekto turístiko pa reapertura di frontera

 

WILLEMSTAD- Djárason 1 di yüli próksimo Kòrsou lo habri su portanan pa turistanan prosedente di Hulanda i algun otro pais Oropeo ku riesgo abou, relashoná ku e pandemia di Covid-19. Teniendo kuenta ku tur protokòl nesesario pa trata na garantisá bienestar di nos pueblo na promé lugá, e sektor turístiko a tuma tur paso nesesario i e ánimo ta haltu pa yegada di e promé turistanan e wikènt entrante.

Sektor turístiko ya pa diferente aña a bin ta fungi komo un pilar sumamente importante pa ekonomia di Kòrsou. E sektor aki pa hopi tempu a bin ta atraé invershonnan sumamente balioso pa nos pais, pero tambe a bin ta sòru pa diferente kupo di trabou pa nos hendenan. Di e forma aki Ministerio di Desaroyo Ekonómiko (MEO) huntu ku Ministerio di Desaroyo Sosial, Labor i Bienestar (SOAW) i CHATA últimamente a bin ta proveé entrenamentu pa medio di e programa ‘Kla pa Turismo’ na diferente siudadano ku tin e afan pa traha den e sektor. Konsekuentemente, algun di nan ya a kuminsá laborá na diferente hotèl, restorant, playanan èts. Sinembargo, e pandemia di COVID-19 a trese na komienso di aña 2020 un paro abrupto na e desaroyonan positivo aki pa nos sektor turístiko.

Na e momentunan aki mundu ainda ta luchando kontra e efektonan direkto i indirekto di COVID-19 i Kòrsou no ta un eksepshon. Apesar di esaki nos ta mira espasio pa Kòrsou, bou di kondishonnan estrikto, kuminsá risibí turista atrobe prosedente for di paisnan kaminda e riesgo di kontaminashon ta relativamente abou. Dor di habri nos frontera di forma responsabel, esaki sigur lo duna un kontribushon na rekuperashon di nos ekonomia.

Durante di e periodo tras di lomba partnernan den sektor turístiko sin mas a sòru di entrená i ekipá trahadónan den e sektor debidamente, pa no solamente sigui duna un servisio optimal pero tambe pa pèrkurá ku ta tene debidamente kuenta ku nan propio bienestar i di kada turista ku bishitá nos isla. Por ehèmpel e sektor di hospitalidat a kompletá resientemente un seshon di protokòl ‘A Dushi Stay, the Healthy Way’, kaminda den estrecho kolaborashon ku outoridatnan den salubridat a krea instrukshon i normanan pa garantisá un apertura sigur di e sektor.

Hopi ta esnan ku kisas den e lunanan tras di lomba mester a kanselá i/òf adaptá nan vakashon pa motibu di COVID-19. Ku reapertura di nos fronteranan nos ta krea e posibilidat pa bishitantenan por bin i eksplorá, relahá i rekargá serka nos i sera konosí ku e diferente bunitesanan di e hoya ku nos ta yama nos kas. Tur kondishon pa turistanan ku lo ke bishitá nos isla ta optenibel riba www.gobiernu.cw i tur protokòl pa nos sektor di hospitalidat ta aksesibel riba www.curacao.com/covidprotocols/