Un mihó maneho di tereno i edifisio di gobièrnu ta na kaminda! 

Un mihó maneho di tereno i edifisio di gobièrnu ta na kaminda! 

 

Willemstad – Ku e meta pa kumpli ku pueblo su nesesidat pa tereno pa bibienda, i un mihó maneho di tereno i edifisionan di gobièrnu, Gobièrnu di Kòrsou a tuma e desishon pa lanta un asina yama ‘Grond en Vastgoed Bedrijf’ (GVB). Riba djaluna 6, djamars 7, i djarason 8 di yüli último, Minister Jesus-Leito huntu ku Maneho di Ministerio di VVRP a tene un workshop ekstenso huntu ku diferente partner pa sigui duna kontenido di e trayekto aki. 

 

Nos pais su situashon aktual ta mustra ku 1) tin un lista largu di espera pa tereno i bibienda, 2) kualke persona ta kue tereno di gobièrnu di forma ilegal i no ta paga erfpacht pa esaki, miéntras ku esnan legal si tin ku paga, 3) tin terenonan disponibel, pero gobièrnu no tin e fondonan pa desaroyá esakinan, 4) tin diferente persona ku a risibí un tereno pero ku no ta hasiendo uso di esaki pa basta tempu kaba, òf a haña e tereno komo ‘optie’ i ta paga masha tiki, kompará si mester paga erfpacht.  

 

E GVB lo bai sòru pa, na un forma mas profeshonal i rendabel atendé ku tereno i edifisionan di Gobièrnu. Di e forma aki, por 1) kumpli ku e nesesidat di nos komunidat pa haña un tereno pa nan por traha nan kas, 2) generá mas entrada pa Gobièrnu for di terenonan ku tin mas balor, 3) tuma desishonnan mas rápido i transparente. 

 

Proseso

Komo parti di Strategia di Kresementu (Groeistrategie), Gobièrnu di Kòrsou a mira e importansia i impakto ku un mihó maneho di tereno i edifisionan di gobièrnu lo trese kuné. Den e kuadro aki, dia 24 di aprel 2019 Konseho di Minister a bai di akuerdo ku e desishon di prinsipio pa lanta un ‘Grond en Vastgoed Bedrijf’. Na yüli 2019 a pone diferente punto di salida stratégiko riba papel, i na òktober a organisá un workshop ku tur ‘stakeholder’. Trabounan preparativo a sigui kana i nèt 1 aña despues dia 24 di aprel 2020, Konseho di Minister a bai di akuerdo ku e dokumento di e struktura di GVB. Pa sèptèmber awor e GVB mester ta kla pa drenta operashon. 

 

Komishon i guia 

Gobièrnu a instituí un komishon ku ta guia e trayekto, kual ta konsistí di Direktor di e Sektor di Infrastruktura i Planifikashon Urbano di VVRP, un kordinadó lokal den persona di Sr. Raymond Begina, PMO Groeistrategie, i partnernan den Reino manera representantenan di Gemeente Amsterdam, Ministerio di Asuntunan Interno i di Reino (BZK), Rijksvastgoedbedrijf. 

 

Dos dia di workshop

Komo parti di e trayekto aki, a tuma lugá diferente workshop dia 6, 7, i 8 di yüli último kaminda Domeinbeheer, ROP, OW, profeshonalnan i ekspertonan lokal a bin huntu pa interkambiá i diskutí. Tur esaki ku e meta pa sigui duna direkshon i forma na e GVB. 

 

Puntonan di salida

Komo base pa Kòrsou yega na su GVB a stipulá e siguiente puntonan di salida:

  • Mester introdusí un sistema pa mara e invershon di proyekto na e preis di e tereno (‘grondexplotatie’), 
  • Ta bin ku métodonan nobo pa kalkulashon di preis,
  • Revisá e sistema di duna tereno di ‘erfpacht’,
  • GVB lo ta un organisashon riba su kurpa bou di responsabilidat di Minister VVRP

 

Traspaso i komunikashon

Den futuro serkano lo determiná kon lo traspasá trabounan i trahadónan di Domeinbeheer pa e organisashon nobo. Entre tantu, esakinan ta sigui tuma lugá normal.  Tambe, den transkurso di e lunanan benidero ku bista riba sèptèmber 2020, lo duna splikashonnan na, i envolví tur partido konserní. Tambe lo duna informashon na komunidat durante henter e proseso. A inisiá esaki ku e promé seshon pa personal. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: