RDK TA FIRMA AKUERDO KU TNO PA DUNA INISIO  KONKRETO NA “HORIZONTE NOBO”

RDK TA FIRMA AKUERDO KU TNO PA DUNA INISIO  KONKRETO NA “HORIZONTE NOBO”

 

Willemstad – 14 di Yüli 2020- E siman aki un delegashon di Refineria di Kòrsou (RdK), enkabesá pa Direktor Interino di RdK, Sr. Marcelino de Lannoy, a biaha pa Hulanda pa inisiá algún proyekto hopi nesesario pa Kòrsou. E proyektonan tin e meta pa eksplotá mas tantu ku ta posibel tur e terenonan i instalashonnan ku RdK ta manehá, banda di e konosido instalashonnan di refineria, terminal i plantanan di utilidat. Pa mas fasil, ta referí na e proyektonan aki ku e nòmber “HORIZONTE NOBO”. RdK durante di e bishita a firma un akuerdo ku TNO pa diseño di un di e proyektonan ku ta forma parti di Horizonte Nobo, esta e asina yama “Living Lab.”

 

“Living Lab” ta un di e proyektonan ku ta forma parti di Horizonte Nobo. Huntu ku e sentro di investigashon tékniko físiko renombrá Hulandes, TNO, lo kuminsá e aña aki mes ku e diseño di plantanan di prosesonan sostenibel di kombershon i di transformashon di portadónan energétiko. E plan ta pa huntu ku kompanianan di sektor privá, kuminsá invertí den e plantanan di “Living Lab” aki. Riba e terenonan na parti wèst di e refineria, pariba di Nijlweg, pronto Korsou lo mira algun aktividat tuma lugá ku ta enserá produkshon di energia, produkshon di hidrógano komo un produkto di kombustibel i materia prima pa eksportashon. Tin planiá tambe pa bini ku plantanan di resiklashon i kompostahe di produktonan residual.

 

RdK a hasi hopi esfuerso pa kuminsá ku tur e inisiativanan aki riba término korto pa asina den e tempu difisil aki por krea trabou i generá divisas. Ku e akuerdo ku a firma e siman aki entre RdK i TNO, e “Horizonte Nobo”, ku ta símbolo di un futuro nobo i duradero, a kuminsá. Segun e sobrá proyektonan di “Horizonte Nobo” sigui i progresá, lo informá komunidat di esei. 

 

Tur esfuerso pa krea mas tantu kupo di trabou i ingreso di divisas pa medio di “Horizonte Nobo” ta kana paralelo na i huntu ku e esfuersonan andando pa buska un operadó pa e refineria, e plantanan di utilidat i e terminal na Bullenbaai.