Marilyn Alcalá-Wallé su karta di despedida

Na Direktiva di partido PAR,

Fokkerweg

Presente

Willemstad, 21 yüli 2020.

Apresiabel Direktiva,

Permití’mi na promé lugá gradisí partido PAR pa e konfiansa duná na mi persona pa por a sirbi e komunidat di Kòrsou pa hopi aña kaba den diferente funshon; i durante e último 3 aña i mei primeramente komo Lider di Kampaña, despues Parlamentario i siguientemente komo Minister di Enseñansa, Siensia, Kultura i Deporte. Mi a hinka mi alma i kurpa shete dia pa siman den kada un di e funshonnan pa sirbi nos komunidat mas mihor posibel. I mi a hasi kada unu segun mi konsiensia i ku hopi honor.

Manera nos sa, oposishon a entregá un keho kontra mi persona pa ‘nevenfuncties/nevenactiviteiten’ pasombra ami i diferente otro Minister tabata inskribí den e registro di Kamara di Komersio. Pero Ministerio Públiko a skohe pa persiguí ami so. Komo persona íntegro i di prinsipio ku mi ta, mi a entregá mi retiro komo Minister mes ora pa den mi tempu liber traha riba e “overdrachtsdocument” pa Gobernashon.

For di e momento ei mi no a haña ningun sosten di partido, direktiva ni lider di partido. Komunidat mes a nota. Ni ora a manda’mi kas komo empleado públiko despues di dos dia ku a bisa’mi bai traha bèk, i e karta aki a sali den medionan di komunikashon, ningun hende di partido a haña nesesario pa tuma kontakto ku mi persona.

Ta ora a sali na kla ku ami ta e persona riba lista di PAR pa tuma asiento den Parlamento, a aserka’mi. No pa duna ningun sosten, pero pa pidi’mi distanshá mi mes di mi derecho riba e asiento aki segun nos “Kiesreglement”, pa e echo ku tin investigashon andando kontra ami lo por perhudiká partido PAR.

Kiko sí partido lo por hasi pa’mi persona o lo por nifiká pa’mi, ningun momento so a bini dilanti. Esaki siendo ku ta prediká sinseridat, honestidat i kristianismo. Esaki ta hasi un dolor inmenso pasombra ami a kere ku nos ta #huntu den bon i malu.

Awor mi a yega na un krusada kaminda mi ta eksperensiando ku mi tin ku skohe un otro ruta. Den tempu difisil un hende ta sinti ken realmente ta sostené. Durante último lunanan tabatin bastante ekspreshonnan di eksponentenan di PAR tantu públikamente komo den pasiyonan den mi direkshon, ku no a keda’mi nada otro di entregá mi retiro di inmediato na partido PAR.

No pa evitá ku mi ta keda un mancha riba e partido. Pasombra mi konsenshi ta limpi i futuro lo mustra esei, pero pasombra un hende no por keda kaminda ta us’é den tempu bon i ta bandon’é ora situashon ta difisil. Ami sigur no ke forma parti di un organisashon asina.

Sa ku semper mi a traha pa bienestar di pais i su hendenan i lo sigui hasi esaki, awor i den futuro.

Atentamente,

Drs. Marilyn Alcalá-Wallé