Dos petishon reunion di Komishon Sentral di parti di frakshon di MFK
Dos petishon reunion di Komishon Sentral di parti di frakshon di MFK, ku topikonan;
Reunion di Komishon Sentral urgente riba e atrako brutal di Gabinete Rhuggenaath, Curoil, Aqualectra i BTP&U riba pueblo di Kòrsou ku subida drástiko den preis di kombustibel, awa i koriente
Reunion di Komishon Sentral urgente riba situashon aktual di Klein Kòrsou, kiko ta bai hasi konkreto i e maneho en general di patrimonionan di Pueblo di Kòrsou
Na Presidente di Parlamento di Kòrsou
Señora A. Pauletta
Wilhelminaplein
Presente
Willemstad, 2 di ougùstùs 2020
Tópiko: Reunion di Komishon Sentral urgente riba situashon aktual di Klein
Kòrsou, kiko ta bai hasi konkreto i e maneho en general di
patrimonionan di Pueblo di Kòrsou
Señora Presidente,
Na nòmber di Frakshon di MFK nos ta aserká bo ku e siguiente preokupashon, gran parti di pueblo di Kòrsou ta preokupá ku e desaroyo total for di òrdu, for di regla i kontra nos leinan ku ta tumando lugá riba Klein Kòrsou. Nos di MFK a hasta bin komprondé ku ta hasi negoshi brutal riba nos patrimonio i pueblo di Kòrsou mes no ta benefisiá di negoshinan ilegal aki.
Den pasado resien tres minister (GMN, VVRP i MEO) a hasi bishita na Klein Kòrsou pa tuma nota di e situashon reinante. Tambe nos a tuma nota ku algun Parlamentario di Koalishon tambe a bishitá Klein Kòrsou. Gobièrnu di Kòrsou a traha un asina yamá, “Advies Nota Klein Curaçao”.
Tur esaki pa enkaminá un proseso pa atendé konforme lei i reglanan di nos Pais ku loke ta pasa na Klein Kòrsou. Pero un biaha mas nos ta konstatá ku e gobièrnu aki di PAR i MAN ta master den benta santu den wowo di Pueblo trahando rapòrt tras di rapòrt, pero no ta hasi nèt nèt nada ku e e kontenido di e rapòrtnan aki.
Hasiendo uso di artíkulo 33 di nos Reglamento di Orden, nos ta pidi bo pa konvoká un reunion urgente riba e tema aki pa nos por debatí i konkluí na unda nos ta awe ku nos patrimonio Klein Kòrsou.
Pa e reunion aki frakshon di MFK ta pidi pa ta presente, Minister I.S. Martina enkargá ku MEI i Minister Z. Jesus-Leito enkargá ku VVRP i GMN
Tambe nos ke pidi tur dokumento relevante promé ku e reunion, pa asina nos por debatí i ta mas efektivo den e reunion aki.
Atentamente,
Charles Cooper
Jacinta Constancia
Gilbert Doran
Juniel Carolina
Na Presidente di Parlamento di Kòrsou
Señora A. Pauletta
Wilhelminaplein
PRESENTE
Willemstad, 3 di ougùstùs 2020
Tópiko: Reunion di Komishon Sentral urgente riba e atrako brutal di
Gabinete Rhuggenaath, Curoil, Aqualectra i BTP&U riba pueblo
di Kòrsou ku subida drástiko den preis di kombustibel, awa i
koriente
Señora Presidente,
Ta insolitó lokual ku nos a konstatá e siman aki, kaminda ku Gabinete Rhuggenaath forma pa PAR i MAN ta disidí di masakrá Pueblo di Kòrsou i ku for di dia 4 di ougùstùs 2020 ta drenta na vigor un oumento drástiko di preis di Gasolin, Diesel, Gas, Koriente i awa. E asuntu aki ta insolito, debí ku preisnan di e derivadonan petrolero na e momentonan aki a bolbe baha. Pues Pueblo di Kòrsou mester a haña un bahada den preisnan, na lugá di un subida.
Pero lokual ku nos ta wak atrobe, ku ora ta toka e Pueblo di Kòrsou, BTP&U, Curoil, Aqualectra i Gabinete Rhuggenaath no ke duna pueblo e bahada ku e meresé. Nan a inventá un maldito “Fuel Supply Garrantee 1A” i “Fuel Supply Garrantee 1B”, esaki ku e mentira ku dor ku NO a haña un operador pa start manehá nos refineria mester bin ku e rekargonan aki.
E rekargonan aki riba gasolin ta mas o ménos 45 sèn pa liter i riba diesel e ta 65 sèn pa liter. Ku otro palabra un belasting skondí ku ta mesun karu ku e preis di kompra di un liter di gasolin i e ta un i mei mas tantu ku e preis di kompra di un liter di Diesel, esaki ta inakseptabel.
Na e momentunan aki, despues di COVID-19 ku hopi hende a pèrdè trabou i hopi siudadano ta lucha pa tene kabes riba awa, ta dal e pueblo aki asina duru den nan saku. No papia mes di e shofùrnan di bus i konvoi ku awor mester bai paga mas karu pa e Diesel ku e ta usa den transporte públiko. Ku e belasting skondí aki, gabinete Rhuggenaath ta hisa kosto di bida innesesariamente.
Hasiendo uso di artíkulo 33 di Reglamento di Orden di Parlamento, nos ta pidi bo pa konvoká un reunion urgente riba e tema aki pa nos por debatí i konkluí kiko nos ta bai hasi pa stòp gabinete Rhuggenaath di masakre Pueblo di Kòrsou.
Frakshon di MFK ta pidi pa invitá na e reunion aki Minister I.S. Martina i Minister Z. Jesus-Leito enkargá ku BTP&U. Pa medio di esaki nos ta pidi presidente di Parlamento pa promé ku e reunion pone tur dokumento relevante promé ku e reunion tuma lugá, pa asina nos por debatí i ta mas efektivo den e reunion aki.
Atentamente,
Charles Cooper
Jacinta Constancia
Gilbert Doran
Juniël Carolina