Deterioro i falta di mantenshon den kamindanan, bòrchinan di bus i roinan

Kòrsou, 5 di ougùstùs 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di Orden di Parlamento, mi kier pidi bo persona pa dirigí e karta athunto na Minister di VVRP, señora Zita Jesus-Leito.

 

Danki pa e koperashon.

 

Atentamente,

 

Juniël Carolina

Miembro di Parlamento

pa frakshon di MFK

 


 

Minister di VVRP

Señora Zita Jesus-Leito
PRESENTE

Kòrsou, 5 di ougùstùs 2020


Tópiko: Deterioro i falta di mantenshon den kamindanan, bòrchinan di bus i roinan


Apresiabel señora Minister Jesus-Leito,

Frakshon di MFK den parlamento a komprondé ku señora Minister a kòrta 20 mion florin den mantenshon di kaya pa baha gastunan di bo ministerio i pa Kòrsou por tin un presupuesto den balansa.

 

Resultado di esaki ta, ku por lo pronto kamindanan ku ya ta den un situashon deteriorá i kibra lo keda bai atras. Meskos ta konta pa roi i plenchinan ku lo no bai haña atenshon, pa asina kombatí shushedat i insektonan den barionan. 

 

Pa loke ta trata bòrchinan di bus, esakinan mester di atenshon urgente. Paradanan di busnan no tin dak i banki pa sinta ariba pa protehá e usuario di solo ku ta kima i/o áwaseru ku por kai, no tin un infrastruktura na paradanan di bus ku ta kumpli ku e nesesidat i funshon di un parada di bus.

 

Suskrito na nòmber di frakshon di MFK, ya pa basta tempu ta hopi preokupá, ku e situashonnan ariba menshoná, prinsipalmente nos kareteranan ku ta den hopi mal estado na Kòrsou i e shushedat en general riba Kòrsou .

 

Konsiderashon ku outomobilista ta paga belasting di number di outo pa por trafiká riba kareteranan di Kòrsou, no ta hustu ni korekto pa piesanan bou di outo ku ta kibra. 

 

Nos ta den temporada di Orkan i un ora pa otro nos por spera basta yobida di áwaseru i nos roinan.

 

Konforme artíkulo 96 di Reglamentu di Orden suskrito ta hasi señora Minister e siguiente preguntanan:

 

  1. Minister ta na altura di e situashon di kareteranan, roinan i bòrchinan di bùs rònt Kòrsou?

 

  1. Minister por informá Parlamento for di kua fondo ta bai ehekutá trabounan den e sektor ariba menshoná awor ku a kòrta ku 20 mion den e presupuesto?

 

  1. Nos tin entendí ku tin basta keho entrega na DOW, pa kiebro di piesa di bou di outo pa motibu di kareteranan den mal estado, Minister por informá Parlamento kuantu keho tin entrega for aña 2016 te ku yüni 2020?

 

  1. Por informá parlamento kuantu di e petishonnan aki a wòrdu honra ku un kontesta positivo i DOW a kubri e gastunan?

 

  1. Minister ta konsiente ku Covid-19, a siña nos ku mester mantené limpiesa i higiena?

 

  1. Minister ta na altura, ku e malesa dengue ya ta plamá den Latino Amérika i ta ta den direkshon, pa yega tambe na Islanan den Caribe?

 

  1. Temporada di Orkan ya ta den kurpa, Minister por informá Parlamento kua ta e akshonnan konkreto ku a i/òf ta bai tuma pa ku limpiesa di roinan pa asina evitá kualkier problema ora awa kai?

 

Na nòmber di pueblo di Kòrsou i komo miembro di Parlamento pa frakshon di MFK mi ta spera ku e preguntanan ta wòrdu kontesta den e tempu akordá entre Parlamento i gobièrnu.

 

Atentamente,

      

 

Juniël Carolina

Miembro di Parlamento

pa frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: