Kònsul Libanes na Kòrsou ta gradisí pa kombibensia ku komunidat di Libanon
Kònsul Libanes na Kòrsou ta gradisí pa kombibensia ku komunidat di Libanon
Willemstad 5 di Ougùstùs 2020 – Djamars último a tuma lugá un eksploshon katastrofal den sentro di siudat di Libanon ku a sakudí mundu henter. Libanon konsekuentemente ta den un situashon di krisis aktualmente. E desaster a kousa un kantidat espantoso di persona ku a fayesá, miles di hende heridá i pèrdí i miones ku a keda desampará i sin hogar. Konsul Honorario di Libanon situá na Kòrsou ta ekspresá palabranan di kondolensia i sosten pa tur esnan afektá pa e katástrofe na e siudat Beirut. Riba e plataforma sosial di Konsulado Libanes na Kòrsou entre otro por sigui e último desaroyonan na Libanon, por risibí informashon pa por duna sosten i tur esnan ku mester di sosten personal por haña informashon di kontakto.
E eksploshon ku a tuma lugá na Libanon djamars último a manda ólanan di shòk rònt mundu pa su magnitut i horor ku e la kousa den e sentro di siudat Beirut. Outoridatnan Libanes ta indiká ku ofisialmente ya por a konta 155 persona ku a fayesé, un gran kantidat di persona pèrdi i mas ku 5000 persona heridá, i aun ta buskando víktimanan ku lo a kai den e haf òf personanan heridá ku pa un milager por a sobrebibí e eksploshon.
Kòrsou tambe ta konsistí di un komunidat grandi di persona desendiente di Libanon ku tin famia, amigu i konosí na Beirut. Tambe hopi ta esnan ku ta bishitá nan ser kerínan den e periodo di aña aki òf ta ku fakansi aktualmente na Libanon. Pa e motibu aki Konsul Honorario di Libanon situá na Kòrsou ta informá tokante nan plataforma sosial riba facebook kaminda por sigui e último desaroyonan tokante e kalamidat, i por tuma kontakto pa risibí sosten òf guia pa drenta den kontakto ku instansianan ofisial ku por yuda nan. [Facebook: Honorary Consulate Of Lebanon – Curaçao]
Komunidat di Kòrsou a demonstrá ku e ta kumbibí ku tantu e komunidat na Libanon komo esnan ku ta biba na Kòrsou. Konsulado di Libanon na Kòrsou ta gradisí komunidat pa tur e mensahenan di sosten risibí. Kònsul Honorario señor Jean Fayad ta ekspresá su gratitut na komunidat di Kòrsou pa esaki. Hopi ta esnan ku ke yuda, pero ku e situashon ekonómiko prekario na Kòrsou e tin tur komprenshon ku pa hopi ta disfisil pa duna sosten. Pa tur esnan ku si por, ta posibel pa duna aporte na Krus Korá di Libanon pa medio di www.redcross.org.lb. Hulanda tambe ta duna sosten pa medio di su Krus Korá ku lo yuda ku e buskeda di viktima i sobrebibente. Por duna aporte na Krus Korá di Hulanda spesífikamente pa e kalamidat aki pa medio di un donashon na Giro 5125 (IBAN NL02 INGB 0000 0051 25). Kònsul Honorario Fayad ta gradisí tur ku ta resa pa esnan ku ta pasando den e katastrofe aki i na nòmber di Kònsulado di Libanon na Kòrsou ta manda su sentimentunan di pésimo pa famianan di esnan ku a fayesé, i ta pidi tur esnan siguiendo e situashon ku tin famia, amigu i konosi, pa mantené fé, pasenshi i sigui resa pa tur esnan envolví.