Tin 11 kompania di Gobièrnu (NV’s) ku saldo negativo. E situashon ta preokupante.
Tin 11 kompania di Gobièrnu (NV’s) ku saldo negativo. E situashon ta preokupante.
Parlamento a kaba di risibí e FMR (“Financieel Management Rapportage”) ku ta wòrdu kompilá na Ministerio di Finansa. E FMR aki ta kontené tambe informashon no detayá riba e situashon finansiero dje diferente kompanianan di pueblo Gobièrnu. Parlamentario Calmes a tuma nota ku atrobe tin kompania di Gobièrnu ta kana atras ku entrega di nan kuenta anual. Loke a hala atenshon inmediato di Sr. Calmes ku varios di e NV’s nan aki tin un resultado negativo. P’esei Sr. Calmes a dirigí un karta ku preguntanan pa Minister di Finansa.
Ta kasi 11 dje kompania di Gobièrnu tin un resultado negativo. Primeramente Sr. Calmes kier sa e motibunan ku tin retraso den entrega dje kuenta nan anual i tambe pe resultado negativo nan presenta. Calmes:”E sifranan aki ta mustra un panorama hopi preokupante”. Tambe Sr. Calmes kier sa kua te maneho ku Gobièrnu ta bai hiba pa trese kambio den esaki paso e situashon aki no por sigui.
Sr. Calmes ta bolbe rekordá e Minister di Finansa ku ta for di 6 di novèmber 2019 ku Calmes mes a hasi petishon di forma ofisial na Minister di Finansa pa Parlamento por risibí e kuenta nan anual di e NV nan di Gobièrnu. Te ku awe e kuenta nan anual no a yega Parlamento i ta opstakulisá ehekushon di su trabounan komo representante di pueblo. Kiko te impakto di e resultado negativo nan aki pa entrada di Gobièrnu i tambe pa ekonomia di Kòrsou ta otro pregunta hasi. Pueblo ta fada di kada biaha ta e víktima ora e kompanianan aki sera, kibra òf asta wòrdu bendi.
Calmes:”Mi ta kere ku mester transformá Gobièrnu su maneho pa ku e kompania nan aki”. Kisas esaki ta muestra ku privatisashon di departamento i servisionan di Gobièrnu a frakasá? Of ta mal maneho? Un kos ta sigur mester aktua rápido pa evita mas sorpresanan amargo riba termino kòrtiku pa nos pueblo.

