Kòrsou ta hopi sushi i mester di un limpiesa general urgente

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Willemstad, 26 di ougustus 2020

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di GMN, Zita Jesus-Leito.

 

Danki pa e koperashon.

 

Atentamente,

 

Juniël R. Carolina

Miembro di Parlamento

pa frakshon di MFK

---

Minister di GMN

Zita Jesus-Leito

PRESENTE

 

Kòrsou, 26 di ougùstùs 2020

 

Tópiko: Kòrsou ta hopi sushi i mester di un limpiesa general urgente

 

Apresiabel Minister,

 

Suskrito miembro di Parlamento pa frakshon di MFK na diferente okashon a bin ta mustra riba diferente aera ku ta hopi sushi i ku mester wòrdu limpia. Hopi biaha e areanan kaminda tin sushedat ta keda den areanan kaminda turistanan ta frekuentá. Esaki ta duna un bista hopi mahos di nos dushi Kòrsou.

 

Durante di un bishita di trabou den e bario di Heintje Kool, a bin dal den dos sitio ku deskonosínan ta uza komo sitio ilegal pa dùmp tur tipo di shushi. Pa kolmo e aktividat no deseá aki ta tuma lugá kontra tur regla i pega ku un skol di fundeshi i dosente (mira potrètnan athunto).

 

Alumno, abitante i komersiantenan no ta kontentu ku e sushedat den e area aki. Dosentenan di e kolegionan den e area aki a reklamá na vários okashon pa ku e dumpmentu di shushi aki, pero nada no ta pasa i pa kolmo algun luna pasa e shushi a wòrdu pega na kandela i esaki tabata un peliger pa e skol.

 

Nos ta tuma nota ku gobiernu no ta hasi nada pa loke ta limpiesa di Kòrsou i komo miembro di Parlamento mi ta aserka Minister hasiendo uso di artíkulo 96 di Reglamentu di órden di Parlamento, ku e siguiente preguntanan;

 

1. Ki dia Minister ta laga inventarisá sitionan kaminda ta dùmp sushi na Kòrsou?

 

1. Ki dia gobiernu tin pensa pa kuminsá ku un limpiesa nashonal di Kòrsou?

 

1. Minister ta na altura ku un akshon grandi di limpiesa di Kòrsou lo krea kuponan di trabou i lo yuda hopi di esnan ku ta den nesesidat awor aki?

 

Atentamente,

 

Juniël Carolina

Miembro di Parlamento

pa Frakshon di MFK