Global Entrepreneurship Week Curaçao ta ekspandé pa teritorio di islanan ariba pa medio di kolaborashon ku PWR
Willemstad: 31 di Ougùstùs 2020
Komunikado pa prensa di Global Entrepreneurship Week Curaçao
Global Entrepreneurship Week Curaçao ta ekspandé pa teritorio di islanan ariba pa medio di kolaborashon ku PWR
WILLEMSTAD – Resien e organisashonnan Fundashon Negoshi Pikiña (FnP) di Kòrsou i Produce Wealth Revolution Agency (PWR), ku base na Sint Maarten, a firma un akuerdo di kolaborashon pa loke ta trata Global Entrepreneurship Week (GEW) pa aña 2020 na e islanan. Na 2014 Global Entrepreneurship Network (GEN), a otorgá lisensia na Fundashon Negoshi Pikiña, pa stimulá i promové Global Entrepreneurship Week riba e islanan di Karibe Hulandes. Despues di a organisá e siman na 2015 na Kòrsou, na 2016 a ekspandé pa teritorio di Boneiru pa medio di un kolaborashon ku un organisashon na e hermana isla. Na e kongresonan anual mundial di Global Entrepreneurship Network i den e ‘GEN Impact Report’ ya menshon a ser hasí di bon trabou realisá na ámbos isla.
Rekonosementu na nivel mundial
Na e kongreso mundial di 2019 organisá pa GEN na Bahrain, Global Entrepreneurship Week Curaçao a risibí e ‘award’ komo é pais ku, basá riba e kantidat di hende ku ta biba na e pais, a logra kolaborashon entre mas partner en komparashon ku e otro 170 pais afiliá na GEN. Kontinuando e ruta pa mas kolaborashon, i ekspanshon di teritorio, Fundashon Negoshi Pikina resien a firma un akuerdo ku e organisashon Produce Wealth Revolution Agency (PWR) pa organisá i kordiná aktividatnan di GEW pa 2020 na Sint Maarten. “PWR, bou di liderazgo di sra. Ife Badejo, a bin ta hasi bon trabou, no solamente na Sint Maarten, pero tambe na otro islanan den parti nort di Karibe,” sra. Elgenia Pieternella, presidente di Fundashon Negoshi Pikiña i Global Entrepreneurship Week Curaçao a bisa. “E aña aki PWR a organisá un kumbre virtual empresarial di 3 dia na kua representante di 35 pais a partisipá. Ku e akuerdo di kolaborashon nos vishon pa paisnan i empresarionan den region uni forsa a haña mas kontenido,” sra. Pieternella a sigui bisa. “Nos islanan tin hopi reto komun i un historia ku konekshon profundo di algun siglo. Trahando huntu nos por ta mas fuerte pa enfrentá reto i krea oportunidat nobo.”
E timnan organisadó di GEW tantu na Kòrsou, komo Boneiru i awor Sint Maarten ta reuniendo virtual riba un base regular, pa no opstante e situashon aktual, tòg tira lus riba importansia di e espíritu di emprendimentu. Por sierto ku e lema pa Kòrsou pa aña 2020 ta; ‘Business The Unusual Way’. E aña aki e ‘Siman Empresarial’ lo tuma lugá di Novèmber 16 te 22.
E tim organisadó di GEW Curaçao ta hasi un yamada na organisashonnan ku ke tene un aktividat pa stimulá ‘entrepreneurship’ pa tuma kontakto ku GEW Curaçao via board@gewcuracao.com òf na telefòn 519 1152. Alabes ta hasi un yamada tambe na organisashonnan ku ke spònser un òf mas aktividat pa tambe tene kontakto ku nos. Pa mas informashon bishitá e website www.gewcuracao.com i e página riba Facebook i Instagram di Global Entrepreurship Curaçao .
