Mester halsa seguridat den tráfiko. Partido Inovashon Nashonal (PIN) ta sumamente preokupá ku e inseguridat ku ta reina den tráfiko na Kòrsou.

 

Mester halsa seguridat den tráfiko.

Partido Inovashon Nashonal (PIN) ta sumamente preokupá ku e inseguridat ku ta reina den tráfiko na Kòrsou.

Willemstad- 6 febrüari 2022 

Pa basta tempu kaba nos por a tuma nota ku tin hopi aksidente den tráfiko ku ta resultá den daño material grandi; òf pió ainda, kaminda hende ta sufri daño físiko severo i ku den algun kaso ta kosta nan bida. Den hopi kaso ta bisto, ku esnan involukrá no a kore nan vehikulo na un manera responsabel, ku e resultadonan tristu ya menshoná. Nos no por sigui asina!

Mester di maneho pa i kòntòl riba uso di via públiko

PIN ta úrgi Minister di VVRP pa konhuntamemte ku Minister di Hustisia bin ku’n maneho pa uso di via públiko na un manera responsabel i asina evitá di trese bida di hende den peliger.

Entre otro gobièrnu mester pone atenshon riba:

• Infrakstruktura, esta riba kayanan ku strepi no halá, kayanan skùr ku falta lus, bochtnan peligroso sin bòrchi pa atvertí, salida ku no tin bon visibilidat debi na matanan ku ta stroba bista riba kaya, ets .
• Mester mas kòntrol di polis riba tráfiko.
• Minister di Hustisia mester duna un instrukshon general na Ministerio Públiko pa nan eksigí sankshonnan mas severo den Korte di Hustisia pa shòfùrnan ku ta trese peliger pa bida di hende den tráfiko. 
• Introdusí un medida pa di forma obligatorio eduká e usuario di via públiko ku fayá ku lei di tráfiko, pa siña partisipá na un manera responsabel den tráfiko
• Start un kampaña pa konsientisa usuarionan di via públiko en general riba reglanan di tráfiko, pa nan hasi esaki na un manera responsabel.

Ta sumamente importante garantisá seguridat di komunidat, na momentu ku ta hasi uzo di nos vianan públiko.

PIN ta lamenta ku e tráfiko insigur ya a kobra varios bida durante e aña aki ku apenas a start. Nos ta ekstendé palabranan di kondolensia na famia, amigu i konosinan di e defuntunan. Alabes nos ke supliká tur hende pa nos ta mas konsiente na momentu ku nos ta partisipá den tráfiko. Laga nos kumpli ku reglanan di tráfiko i asina rèspètá bida di nos próhimo.