Skolnan ta un riesgo mes òf mas grandi ku eventonan kaminda hopi hende por bai, ta stòp e evento nan aki pero ta mantené skolnan habri poniendo salu di tur esnan den enseñansa na peliger

 

 

Skolnan ta un riesgo mes òf mas grandi ku eventonan kaminda hopi hende por bai, ta stòp e evento nan aki pero ta mantené skolnan habri poniendo salu di tur esnan den enseñansa na peliger

 

Frakshon si MFK den pasado a hala atenshon di Minister di enseñansa señor Eugenne Ruggenaath, riba e preokupashon ku ta biba bou di maestro i mayornan pa ku un posibel kontagio di e vírus di COVID-19 na skolnan.

 

Nos a tuma nota ku den e último siman nan ku a transkurí Kòrsou a registrá diferente kaso di COVID-19 i te hasta ku Kòrsou a konosé infekshon bou di alumnonan di sierto skolnan. Esaki ta trese kuné ku skolnan por ta un foko, kaminda e vírus lo por plama rápidamente i hasi un daño pa loke ta trata salu di nos studiantenan.

 

Gabinete Rhuggenaath no ta hiba un maneho konsistente den tumamentu di desishon relashoná ku protekshon pa e vírus no sigui plama. A para tur evento kaminda por tin hopi hende, debí ku e eventonan aki por resultá den un foko pa e vírus wòrdu plama bou di nos komunidat.

 

Suskrito no ta mira e lógika den e desishon di gabinete Rhuggenaath pa para tur evento kaminda por tin hopi hende, miéntras ku ta laga skolnan si habri kaminda kada skol ta konta ku por lo mínimo ku 200 alumno òf mas. Den pousá tur e alumnonan aki ta bin huntu i esaki ta krea e mesun riesgo ku un evento kaminda hopi hende lo ta presente.

 

Nos por tuma nota ku diferente dosente i tambe lidernan di e diferente sindikatonan ku ta representá trahadó nan den enseñansa ta mustrando Gobiernu riba e riesgo grandi ku hinter e sektor aki ta kore pa wòrdu kontaminá ku e vírus di COVID-19.

 

Suskrito un biaha mas kier hasi un petishon dramátiko riba gabinete Rhuggenaath, pa konsiderá e desishon pa sera skolnan pa un periodo di dos siman i asina ta aisla i protehé e sektor di enseñansa kaminda e vírus por plama rápidamente. Pa asina nos prevení i kuida salu di tur ku ta den e sektor di enseñansa, pero tambe di tur abitante di Kòrsou.

 

Nos sa di diferente skol ku durante di e lock-down a duna lès pa via di e sistema virtual i nos no ta mira, dikon e opshon aki no por wòrdu implementá un biaha mas pa salvaguardá bida di hende.

 

Nos ta spera ku den kurso di e siman aki gabinete Rhuggenaath tuma e desishon korekto di sera skolnan pa un periodo di dos siman pa asina profeshonalnan den salubridat por kontrolá i frena e pandemia di COVID-19 ku ta plamando na Kòrsou.

 

Gilbert Doran

Parlamentario pa

Frakshon di MFK