‘Grond en Vastgoed Bedrijf’ pronto lo ta un realidat

 

‘Grond en Vastgoed Bedrijf’ pronto lo ta un realidat

 

Willemstad – E trayekto pa yega na un ‘Grond en Vastgoedbedrijf’ pa Kòrsou ta kanando. Meta di e trayekto aki ta pa Gobièrnu atendé na un manera nobo ku terenonan di gobièrnu, na benefisio di nos komunidat. Den kuadro di esaki, a tene un di tres seshon informativo riba djabièrnè último, 4 di sèptèmber, ku empleadonan di Domeinbeheer. 

 

Durante di e seshon aki, Minister Jesus-Leito a enfatisá riba e importansia di un GVB, riba e echo ku tin tur atenshon pa e personal durante di e traspaso, i ku lo traha ku diligensia pa finalisá e trayekto na un manera eksitoso. Tambe a duna informashon amplio tokante e status di e trayekto. Segun planifikashon, ya pa final di sèptèmber mester tin un organisashon forma riba papel, pa despues sigui ku e implementashon. 

 

Nos pais su situashon aktual ta mustra ku 1) tin un lista largu di espera pa tereno i bibienda, 2) kualke persona ta kue tereno di gobièrnu di forma ilegal i no ta paga erfpacht pa esaki, miéntras ku esnan legal si tin ku paga, 3) tin terenonan disponibel, pero gobièrnu no tin e fondonan pa desaroyá esakinan, 4) tin diferente persona ku a risibí un tereno pero ku no ta hasiendo uso di esaki pa basta tempu kaba, òf a haña e tereno komo ‘optie’ i ta paga masha tiki, kompará si mester paga erfpacht.  

 

E GVB lo bai sòru pa, na un forma mas profeshonal i rendabel atendé ku tereno i edifisionan di Gobièrnu. Di e forma aki, por 1) kumpli ku e nesesidat di nos komunidat pa haña un tereno pa nan por traha nan kas, 2) generá mas entrada pa Gobièrnu for di terenonan ku tin mas balor, 3) tuma desishonnan mas rápido i transparente. 

 

Gobièrnu lo sigui duna informashon di e trayekto aki.