Deklarashon di Promé Minister riba e último Desaroyonan entre Kòrsou i Ulanda

Deklarashon di Promé Minister riba e último Desaroyonan entre Kòrsou i Ulanda

Geplaatst op 18 September 2020 dor di Ministerio Asuntunan General i Promé Minister

Kerido pueblo,

Konforme palabrashon i e kompromiso ku mi tin ku boso, mi ke duna boso awe un update mas tokante nos kombersashon ku Hulanda, den kuadro di e ayudo finansiero ku nan a ofresé i e kondishonnan mará na esaki.

Loke mi por bisa ta ku e kombersashonnan a sigui di forma intensivo. E tipo di negosashonnan aki no ta fásil, ya ku mester tene kuenta ku hopi aspekto tékniko. Sinembargo, mi por bisa si ku nan ta produktivo. Nos ta hañando mas i mas klaridat i ta logrando avansenan importante pa por yega na otro.

Entre otro mi por bisa ku nos a klarifiká e parti di lei ku ta toka e funshon di Parlamento i kon pa atendé esaki ku e rèspèt nesesario. Asina ta logra mantené e posishon outónomo di nos pais, kual ta un parti sumamente importante pa nos.

Durante e kombersashonnan tambe nos a trese dilanti loke Sekretario di Estado Knops mes a bisa tokante un plan di invershon, banda di e reformanan. Nos ta tratando pa esaki logra via e asina yamá “Landenpakket”, inkluyendo otro dokumentonan mará na esaki ku ta negoshando simultaneamente. Asina por start ku e kresementu sosio-ekonómiko ku tantu nos mester.

Ademas, a pidi aklarashon riba vários otro punto inkluí den e dokumentu, manera durashon di e provishon di lei pa un periodo di 6 aña. Tambe a hasi sugerensia pa logra ku Kòrsou tin mas partisipashon den e asina yamá Caribische Hervormingsentiteit.

Atrobe, úniko forma pa logra avanse ta dor di sinta na mesa ku otro, komprondé kiko realmente ta e nesesidat i yega na solushonnan duradero pa nos pais.

Mi ke enfatisá ku nos mester keda firme riba nos meta. Esta, pa di un forma responsabel, Gobièrnu sigui kumpli ku su deber di sostené pueblo, inkluyendo nos empresanan, trahadónan i esnan mas vulnerabel, miéntras ta krea espasio pa rebibá i modernisá nos ekónomiá i krea kuponan di trabou duradero.

Ta bèrdat ku nos mester di sosten finansiero… anto urgente! E oferta di Hulanda… ta esei ta loke nos tin awor akí riba mesa, mará na e kondishonnan ya konosí.

Mi ke sugeri kada un di boso pa keda kòrda ku meskos ku nos ta wak nos derechonan, nos mester wak nos obligashonnan tambe.

Klaro ku nos tambe a evaluá vários fiansa riba merkado internashonal i lokal. Pero echo ta ku den un kaso asin’akí mester tene kuenta ku un tasa di interes haltu, ya ku e riesgonan mará na nos pais ta haltu. Na fin di dia, nos mester tin e kapasidat di paga bèk, e suma fiá plùs interes. I na momento ku no por paga bèk, sigur ora ta trata di instanshánan privá manera banko, e konsekuensianan pa pais lo ta serio. Djis pensa riba hipotek di bo kas.

Hasta si logra fia riba merkado lokal, tambe nos lo haña nos ku un interes muchu mas haltu ku loke Hulanda ta ofresé. Hulanda ta fasilitá pa nos fia riba NAN ‘rating’ di riesgo i ku un tasa di interes di 0%. Mihó dil ku esaki práktikamente no tin. Komo un Gobièrnu responsabel, nos MESTER pensa na solushonnan finansiero responsabel pa riba término largu, no solamente riba término kòrtiku.

E kombersashonnan ku Hulanda ta rekerí un aserkamentu bon deliniá i profeshonal, ku ta pone ku no ta tur ora por kompartí e adelantonan ku nos ta hasi inmediatamente ku boso. Mi ke pidi boso komprenshon pa esaki i tambe pa konfia ku, na su debido tempu, lo mi semper tene boso informá.

Gobièrnu por sierto a hasi hopi esfuerso pa informá, splika i aklará mas tantu ku ta posibel na gruponan di interes den vários seshon. Lástimamente, no ta tur hende ta komprondé e importansia di union i konfiansa den e proseso. Esaki sin mas ta stroba Gobièrnu pa hiba un bon negosashon ku Hulanda.

Lo mi sigui informá boso semanalmente tokante resultado di e kombersashonan.

 

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: