Éksitoso komienso di Curaçao SDG Action Week
Éksitoso komienso di Curaçao SDG Action Week
Geplaatst op 28 September 2020 dor di Ministerio Asuntunan General i Promé Minister
WILLEMSTAD – E promé dia di e evento virtual Curaçao SDG Action Week 2020 tabata kargá ku interkambio di informashon relevante. Diferente eksperto a duna presentashonnan inspirativo ligá na e tema “Curaçao 2030: Vision for a sustainable future” (Kòrsou 2030: vision pa un futuro sostenibel). Despues ku djabièrnè siman pasá Konseho di Minister i mundu henter a konmemorá 5 aña ku a lansa e Metanan pa Desaroyo Sostenibel (Sustainable Development Goals – SDGs), djaluna a start ku un evento yen di energia inovativo for di diferente huki di personanan ku interes den e tema di SDG. Un kantidat di partisipante lokal i internashonal a forma parti, hasi pregunta i duna nan punto di bista via di un enkuesta online. E entusiasmo pa sigui papia tokante desaroyo sostenibel di Kòrsou ta sigui henter e siman aki, pues registrá pa bo tambe forma parti.
Dwigno Puriel, Sekretario General di Ministerio di Tráfiko, Transporte i Planifikashon Urbano (VVRP) a duna un bista amplio di e transformashon ku VVRP a prepará pa Kòrsou 2030. E presentashon a toka puntonan ku a elaborá riba dje den e rapòrt “Transforming Urban Curaçao” ku ta duna un bista amplio di e kambionan di infrastruktura planiá pa Kòrsou den futuro.
Miguel Goede, direktor di “University of Governance” i “Goede Consultants” a splika tokante e retonan ku Kòrsou ta konfrontando i e echo ku COVID-19 a eksponé esakinan aun mas. Pues ta bira mas esensial pa krea un realidat nobo ku ta pas mas ku e retonan ku mundu por enkontrá den futuro. Diferente plannan di pasado a mustra ku e trahamentu huntu ta vital pa logra.
Corina Regales, miembro di e tim multidisiplinario di Krea2069 a elaborá riba kon Kòrsou lo por ta na aña 2030 ku un sentro di siudat limpi, uso mas efisiente di energia solar i energia di bientu, i produkshon propio di agrikultura ku por ehèmpel mata riba dak di edifisionan pa hasi mihó uso di espasio i pa un ambiente mas fresku.
Cindy Jozefa – Do Rego di Project Management Organization a trese dilanti ku e Strategia di Kresementu ta un ehersisio pa enfoká riba akshonnan ku mester tuma lugá den Gobièrnu pa nos por hasi e kambionan struktural pa yega na un Kòrsou sostenibel pa karga e futuro gubernamental. Importante den esaki ta pa realisá ku nos tin limitashon, kual ta hasi posibel pa hasi e eskoho nesesario pa por realisá e loke di bèrdat ta importante.
Raynel Martis, representante di Ministerio di Desaroyo Ekonómiko i èks “UNDP Representative in Curaçao” a splika e desaroyo pa Kòrsou kuminsando for di Millenium Development Goals, Plan Nashonal di Desaroyo di Kòrsou 2015-2030 te na e trayekto ku a kana pa yega na implementashon di e SDGs pa Kòrsou. A duna un bista kon ya Kòrsou a kuminsá implementá e SDGs via di e Komishon Nashonal pa SDGs i Agènda 2030 na Kòrsou i e diferente komishonnan.
Ahinda tin hopi mas den e programa di Curaçao SDG Action Week. Registrashon pa partisipá ainda ta posibel via e página di Facebook: SDG Curaçao 2030. Pa mas informashon, bishitá nos wèpsait http://www.curaçao2030.cw. Tambe por tuma kontakto ku nos libremente via Instagram òf un di nos plataformanan virtual.