Minister Xiomara Maduro:  Nos Florin no ta na peliger Awor no ta momento pa informacion infunda y incorecto cu ta crea desconfiansa den nos Pais

Minister Xiomara Maduro: 

Nos Florin no ta na peliger

Awor no ta momento pa informacion infunda y incorecto cu ta crea desconfiansa den nos Pais

 

ORANESTAD – Minister Maduro a tuma nota di e articulo di sr. Alberts titula, Posicion di Florin na peliger’ publica den Bondia Aruba di 28 di september. Den e articulo ta purba sugeri cu e emision di bono di Gobierno cu recientemente a tuma lugar lo perhudica e balor di nos Florin. Ademas sr. Alberts den su articulo ta purba desacredita Banco Central door di sugeri cu e instancia cu mester percura pa e balor di nos Florin, no a conseha Gobierno debidamente. Corectamente Banco Central a reaciona e mesun dia riba e contenido di e articulo aki, brindando informacion corecto riba e situacion di divisas na Pais Aruba y mustrando cu nos Florin no ta core peliger. Banco Central a informa cu pa promer biaha Aruba tin un reserva di divisas cu ta cubri 10 luna di importacion, cual ta hopi mas cu e 3 luna rekeri pa standard internacional.

 

Minister Xiomara Maduro ta lamenta cu memey di un crisis di likides ocasiona pa un pandemia, ta bin cu noticia tendencioso y incorecto. Esaki no ta sirbi e bienestar di nos Pais. Nos Florin ta representa tambe nos identidad como Pais y esey no ta algo pa haci wega (politico) cune. Como experto mester a percura pa busca informacion corecto ora ta duna opinion y como periodista mester a busca e otro banda di medaya promer cu publica algo cu ta atacha locual nos Pais y su hendenan ta identifica nan mes cune. Un crisis ta exigi cu tur hende mester asumi nan responsabilidad pa evita cu ta bin mas crisis. Awor no tin espacio pa informacion infunda, incorecto cu ta crea desconfiansa sin tin mester den nos Pais.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: