Minister Armin Konket satisfecho ku independisashon di Konseho Supremo Elektoral ta bira realidat.

 

Minister Armin Konket satisfecho ku independisashon di Konseho Supremo Elektoral ta bira realidat.

 

Willemstad –    Mundialmente a keda probá ku konfiansa den gobernashon ta oumentá na momentu ku elekshonnan ta transparente, sin metementu di polítikonan i bou di guia di un instansia independiente i imparsial.

 

 

Parlamento di Kòrsou , ku 11 voto na fabor i 5 kontra, a aprobá e proposishon di lei pa independisá Konseho Supremo Elektoral (KSE). Mi ta satisfecho ku e trabou ku nos ámternan a traha i di e sosten di e 11 miembronan di Parlamento ku a vota na fabor di e lei. Awor ku KSE ta keda independisa, ta salbaguardiá e proseso atraves di kua suidadanonan por ehersé un di e derechonan fundamental den nos estado di derecho.

 

E legitimidat ku Gobièrnu tin pa goberná, e ta risibí a base di e mandato di pueblo. E forma riba kua e legitimidat aki ta keda atkerí ta krusial pa kalidat di e legitimidat i pa e disponibilidat di un i tur pa rekonosé esaki. Si elekshonnan ta karesé di legitimidat, anto esaki lo por hiba na instabilidat i krea asina un ambiente den kua korupshon por oumentá rápidamente. 

 

KSE te ku 2016 por a hasi trabou di forma independiente ya ku e ministernan di turno tabata traspasá outoridat pa ku elekshon na KSE. Sinembargo, na 2017 kosnan a kana totalmente robes te ku Gobièrnu di Rèino mester a kai aden. Historia riba e punto aki ta skirbí. Importante ta pa e página skur aki den nos historia demokrátiko no keda ripití.   

 

Kòrsou pabien!

 

 

Foto: Minister Konket i algun miembro di KSE