SDKK i Serena Art huntu ta sigui traha tas di Chichi durante di Covid-19
SDKK i Serena Art huntu ta sigui traha tas di Chichi durante di Covid-19
Geplaatst op 05 October 2020 dor di Ministerio Hustisia
Willemstad – Aña 2020 a trese diferente reto pa SDKK tambe. Kambionan drástiko den manera di pensa i hasi kos, ku Kòrsou komo pais, meskos ku rònt mundu, tin ku pasa den dje pa motibu di Covid-19. SDKK tambe tin ku sigui buska i/òf empoderá aliansanan positivo aktual i benidero pa asina sigui krea oportunidatnan balioso den kuadro di resosialisashon, pa esnan ku ta detené den e instituto. Sigur posibilidatnan kaminda por duna servisio na negoshantenan lokal ku por sierto tambe ta pasando den tempunan difísil.
Den e kaso aki SDKK i Serena Art, e fundadó di e pòpchinan di Chichi a sigui ku nan forsa uni pa mustra nan vishon i mishon kompartí pa loke ta trata un di e trayektonan di resosialisashon den SDKK. Durante di simannan ku a pasa e departamento di furamentu, bou di guia di werkmeester señor Kenneth Weigle i e kordinadó di estudio, formashon i treinen, señor Otmar Sasso, a logra finalisá un petishon di parti di Serena Art, pa loke ta trata produkshon di tasnan di tela di pruga. E petishon aki tabatin retraso pa motibu di e promé fase di lockdown.
Den e último deliberashonnan entre Tim di Maneho, Tim di Krísis huntu ku Minister di Hustisia a palabrá ku lo trata na tene mas tantu di e posibilidatnan pa resosialisashon, i den e kaso aki un di nan ta e produkshonnan di e tasnan di tela di pruga, aki tambe aktivo. Es desir tambe durante di e un eventual futuro posibel lockdown. Ku un grupo mas chikí di klientenan, e periodo ku ta tras di lombra, e Unidat di Korekshon ku ta responsabel pa resosialisashon, a logra finalisá e petishon aki.
Serena Art tabata na altura ku no tabata fásil, paso Covid-19 a pone diferente restrikshon tambe den SDKK. Finalmente nan a keda kontentu i satisfecho ku e resultadonan di e tasnan di tela di pruga. Pa e motibu ei SDKK ta di opinion ku asta durante di e periodo di Covid-19 aki, mester keda krea i duna, mas tantu ku ta posibel i te kaminda ku por, e posibilidat na e klientenan detené pa desaroyá nan talento – i abilidatnan natural.
E departamentu di furamentu a hinka nan skouder i forsa pa por a realisá e petishon aki pa den un forma efektivo i efisiente. Ta p’esei ta importante pa mustra pueblo di Kòrsou di un banda ku, lòs di e echo ku e klientenan a faya ku nos leinan vigente i nan ta será den SDKK, di otro banda nan tin nan parti positivo tambe ku nan por duna nan aporte di e forma aki.
