Siman di kultura ta tras di lomba

Selebrashon di siman di kultura ta tras di lomba…kiko awor?
Selebrashon di siman di kultura mester hasi nos konsiente ku edukashon di nos yunan mester pas ku
nos identidat.
Willemstad, 5 di òktober 2020 Den e siman tras di lomba nos a selebrá siman di kultura. Awor kiko ta e
balor agregá di e dianan aki pa nos si nos no hasi nan parti di hende su formashon struktural?
Ta bon pa nos analisá ki tipo di suidadano nos sistema di enseñansa i nos sosiedat a bin ta produsí. Si nos
no ta satisfecho ku esaki nos lo mester kuminsá pone lus riba nos historia. Awe nos ta konta 374 aña di
kolonisashon di nos pais. Esaki no ta nifiká djis kolonisashon di e 444m2 di nos pais. E ta nifiká
kolonisashon di nos mentalidat di habitantenan di pais Kòrsou. Mentalidat ku a pasa di generashon pa
generashon i ku te awe nos ta mira su evidensia. Nos ku tin yu di kolo pero ta kumpra pòpchi blanku so
pe yu, nos ku ta ekonómikamente stanká i ku ta sintá wardando riba un invershonista, nos ku ta kere ku
ta hulanda mester bin supervisá loke ta pasa aki paso nos mes no por, nos ku ainda ta kere ku
enseñansa mester ta na hulandes. Pues ta mira e mentalidat kolonisá aki asta den maneho di nos pais,
pero prinsipalmente den nos sistema di edukashon.
Awor ta momento pa nos hasi adaptashonnan si nos ke forma suidadanonan mentalmente liber. Esta
forma e siguiente generashon di manera ku e si kapas pa hiba nos pais na e siguiente nivel. Pa nos yega
asina leu nos mester wak otro den kara, aseptá unda nos mester a hasi mihó i karga nos responsabilidat
pa hiba un maneho pa koregí nos erornan. Edukashon enfoká riba mihó konosementu i aseptashon di
nos identidat, mas konfiansa den nos mes, mihó maneho finansiero, desaroyo di mentalidat
empresarial, edukashon anti korupshon, mas kombibensia, mas konsiente di nos mes i mas servisial na
otro. En todo kaso un edukashon ku ta reforsá nos talentonan i pone nos debilidatnan den desaroyo.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: