FFK KU APERTURA PA AKADEMIA DI FUTBÒL PA DAMA!

FFK KU APERTURA PA AKADEMIA DI FUTBÒL PA DAMA!

 

 

Djaluna, 5 di òktober a tuma lugá e apertura di e akademia di futbòl pa dama. Esaki ta un proyekto di FFK kaminda a reklutá 15 hobensita entre 10 pa 13 aña ku lo bin huntu riba djaluna ku djamars despues di skol pa hasi nan tareanan di skol i práktika nan deporte preferí. FFK mes lo sòru di buska nan for di skol, laga nan kambia paña pa despues nan kome, traha nan ‘huiswerk’ i por último práktika futbòl.

Despues di a organisá diferente festival di skol kaminda e entrenadónan di FFK ta tin un bista mas amplio riba e hungadónan, por a reklutá un grupo di 15 dama ku a resaltá i bin na remarke pa partisipá na e akademia aki.

Meta di e proyekto aki ta pa nos por tin un grupo selektá di hóben futbolista ku lo bira e tim básiko di nos selekshon nashonal di dama ku lo representá nos na e diferente kompetensia na nivel internashonal. Mas ku klaro e staf tékniko lo traha riba e parti tékniko i práktiko di e hóbennan aki p’asina hisa nan nivel futbolístiko. Tambe esaki ta trese un èkstra ‘boost’ i promoshon pa nos damanan ku a bin ta profilá den nos futbòl lokal.

Aparte di e akademia pa dama FFK tin su grupo di ‘Elite’ di dama ku ta práktika 2 bes pa siman ku tin e mesun meta ku e akademia di futbòl pa dama. E damitanan ku ta den e akademia tambe ta djòin huntu ku e sobra hungadónan di e grupo elite aki i nan ta praktiká 4 bia pa siman riba e desaroyo di nan abilidatnan. Pues tiki tiki pero sigur FFK a bin ta traha duru riba e desaroyo i promoshon di futbòl di dama aki na Kòrsou.

 

5 òktober 2020

 

 

 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: