UNESCO i Blackboard Academy a lansa inisiativa pa trein maestronan gratis riba tèknikanan online i siñamentu miksto pa sostené enseñansa di kalidat durante COVID-19

 

UNESCO i Blackboard Academy a lansa inisiativa pa trein maestronan gratis riba tèknikanan online i siñamentu miksto pa sostené enseñansa di kalidat durante COVID-19

 

30 maestro den Karibe, inkluyendo Curaçao, a haña sertifikado riba Dia Mundial di Maestro 5 òktober 2020

 

Willemstad. UNESCO na ougustus último a lansa e proyekto piloto sub regional di Karibe 2020 riba dunamentu di lès online tur esaki den kontesta riba e efekto ku COVID-19 tin riba enseñansa mundialmente. UNESCO huntu ku Blackboard Academy Caribbean a organisá un workshop intensivo di 4 siman, kaminda a duna desaroyo profeshonal na maestronan di Karibe Ingles i Hulandes den forma online pa utilisá strategianan di siñamentu miksto (blended learning) i strategianan online di un manera kompetente den enseñansa di distansia  i online den tempu di COVID-19 i mas ayá.

Representantenan di DOS, Universidat di Curaçao, un maestro i Komishon Nashonal di UNESCO Curaçao a partisipá den e programa piloto i a kompletá e treining akí eksitosamente. Djaluna riba Dia Mundial di Maestro UNESCO i Blackboard Academy Caribbean a entregá virtualmente e sertifikado na 30 partisipantenan di Karibe Ingles i Hulandes, ku a pasa e treining ku èksito. Mas ku 60 persona den área di enseñansa of ligá ku enseñansa a haña nan sertifikado durante un seremonia virtual.

 

Meta di e inisiativa tabata pa un grupo di 40 master fasilitadónan den sub region di Karibe haña treining komo eksperto riba siñamentu miksto i strategianan di online pa despues nan trein 200 maestro, 10 pa pais, ku e abilidatnan pa apliká métodonan inovativo di enseñansa online, siñamentu miksto i strategianan di online den e situashon nobo di enseñansa den e tempu di COVID-19.

Adishonalmente e training ta empoderá e abilidat di maestronan pa respondé na e krisis aktual den un ambiente lokal i pa reforsá resiliensia di e sistemanan edukashonal sub regional pa futuro krisisnan ku por surgi. Den nos sub region di Karibe banda di 7 mion studiante den 23 pais a haña nan mes afektá pa e virus di COVID-19. Enseñansa di largu distansia tabata i ta un reto durante e krisis manera entre otro falta di bon konekshon di internet i akseso na esaki, maestronan ku no ta dispuesto pa kambia di e forma tradishonal di duna lès den klas pa duna lès online.

 

Den kuadro di e desaroyonan akí UNESCO a lansa un  Koalishon Mundial pa Enseñansa (Global Education Coalition),  ku ta un kompromiso di agensianan di Nashonnan Uní, Organisashonnan Internashonal, sektor privá i representantenan di Sosiedat Sivíl. Esakinan a hasi un kompromiso pa duna sostén riba nivel di enseñansa na e paisnan afiliá na e organisashon riba nivel global, regional i di pais den kuadro di COVID-19. Blackboard Academy i Microsoft ta entre e partnernan di e  Koalishon Mundial pa Enseñansa ku ta ofresiendo nan servisionan gratis na UNESCO. Kursonan di Blackboard Academy ta bon ehempel di mihó práktikanan riba siñamentu online duná pa ekspertonan riba enseñansa digital.

 

Marva C. Browne 

Secretary General Curaçao NatCom

5/10/2020

This site uses Akismet to reduce spam. Learn how your comment data is processed.

error: Content is protected !!
%d bloggers like this: