Cpost International N.V. a lansa seri di stampia den kuadro di elekshon presidensial na Merka

Cpost International N.V. a lansa seri di stampia den kuadro di elekshon presidensial na Merka

 

Resientemente den un ambiente ameno den kompania di minister di Tráfiko, Transporte i Planifikashon Urbano, sra. Zita Jesus Leito, Kònsùl General Merikano, sr. Allen Greenberg i un grupo chikitu di invitado, sr. Thomas Roggendorf, direktor di Cpost International N.V., a presentá e promé edishon di e seri di stampia konmemorativo di presidentenan Merikano. Esaki a tuma lugá na e Kònsùl Merikano situá na Kòrsou, den kuadro di e elekshon ku lo tuma lugá 3 di novèmber 2020 na Merka.

 

Cpost komo e kompania di pòst ofisial nashonal di Kòrsou, tin e konseshon postal, i relashoná ku esaki tin e deber pa produsí serinan di stampia nobo anualmente. Ku bista riba e elekshon ku ta bai tin na Merka na novèmber próksimo, Cpost a pensa ku lo ta un bon idea pa krea un seri di stampia konmemorativo, esaki sigur mirando e impakto ku e elekshon aki tin no solamente riba Merka, sino riba henter mundu. Ku e seri di stampia aki nos ta rekòrdá i duna honor na no ménos ku shete, di e 54 presidentenan Merikano, ku tabata mas popular òf ku a hasi un impakto grandi den nan tempu. E presidentenan aki ta: George Washington, Abraham Lincoln, Franklin D. Roosevelt, John F Kennedy, Ronald Reagan, Barack Obama, i Donald Trump. 

 

‘Aparte di e elekshon ku lo tuma lugá na Merka na novèmber próksimo, otro aña lo tin elekshon na Hulanda i manera nos sa tambe lo tin elekshon na Kòrsou na luna di mart. Ku e seri di stampia konmemorativo aki no solamente nos ta presentá un seri bunita di stampia, pero tambe nos ta para ketu na e echo ku tantu na Merka, na Hulanda i na nos pais, Kòrsou, nos tin e privilegio di tin elekshon liber i demokrátiko, lokual ku lástimamente no tin na tur pais na mundu’, segun sr. Thomas Roggendorf, direktor di Cpost International. 

 

E seri di stampia aki ta pintá pa e famoso pintor yu di Kòrsou, sr. Girigorio Adriana, mihó konosí komo Papi. E ta optenibel na tur e filialnan di Cpost International N.V.  i tambe via di e plataforma di stampia di Cpost International https://www.cpostinternational.com/philately/ pa e merkado internashonal. 

 

Foto:drpd: Kònsùl General Merikano, sr. Allen Greenberg, sr. Thomas Roggendorf, direktor di Cpost International N.V., pintor yu di Kòrsou, sr. Girigorio “Papi” Adriana, Minister di Tráfiko, Transporte i Planifikashon Urbano, sra. Zita Jesus Leito