Pashènt no mester paga preis haltu pa su salú

 

Pashènt no mester paga preis haltu pa su salú

 

 

Willemstad, 20 òktober 2020

 

Durante aña 2019 Konseho di Minister kompletu a bai di akuerdo ku instalashon di ‘Taskforce Marktordening en Financiering Zorgsektor’, un tim multidisiplinario, ku miembronan di entre otro GMN, SVB, Departamento Hurídiko, BTP komo e futuro outoridat pa kalkulá tarifa i representantenan di parti di ministerio di finansa, pa baha gastunan de área di salú. Komo resultado, basa riba dos rapòrt, esta di e Taskforce i tambe un rapòrt di SVB, a determiná ku mester baha gastunan di salú ku setenta (70) mion. 

 

E bahamentu di gastu ta na benefisio di pueblo: Ningun hende nos mester paga primanan haltu pa remedi, spesialista i hòspital. Salubridat públiko mester keda pagabel.

 

Partido Inovashon Nashonal (PIN) a tuma nota di un karta di Inspektor di Salú ku ta bai rònt riba medionan sosial. Klaramente e Inspektor no ta bon informá riba e tarea di e Taskforce, ni su komposishon, ni e trayekto ku a kana i ku si tabatin reunion ku e sektornan konserní, ni e resultado. Tampoko e motibunan pa baha gastu na fabor di pueblo no ta parse di ta  konosí serka inspektor. 

 

Lógikamente ku importadornan di remedi ta bringa pa no baha nan entrada. Na final di kuenta niun hende, ni sektor lo ta di akuerdo pa baha nan entradanan. 

 

Nos komo pueblo mester vigilá pa ni gobièrnu, ni SVB drai bèk e medidanan den sektor di salú, ku ta baha e entradanan di esnan ku ya tin entrada grandi manera importador di remedi, paso e ora ei e reforma di gastu den salú lo bai kai direktamente riba skouder di e trahadó por medio di un subida di prima di seguro básiko pa salú.

Pa PIN un subida di prima ta innesesario i p’esei inakseptabel. Medidanan aprobá pa hinter Konseho di Minister no por keda di drai bèk a kosto di e pueblo.